१६ मिटरमात्र भत्काए मुआब्जा चाहिँदैन, २५ मिटर भत्काउने हो भने मुआब्जाबिना हुँदैन : कटुवाल
तु खबर संवाददाता
मकवानपुर, २० असार । मकवानपुर उद्योग बाणिज्य संघका अध्यक्ष तथा हेटौंडा बसोबास संरक्षण समितिका अध्यक्ष कृष्ण कटुवालले सडक बिस्तारको काम न्यायोचित तरिकाले गर्न माग गरेका छन् ।
तु खबरसँग कुराकानी गर्दै अध्यक्ष कटुवालले विकासको बाधक आफूहरु नभएको दोहोर्याउँदै मुआब्जा दिन सक्ने अवस्थामा सरकार नभए १६/१६ मिटरमात्र भत्काउन आग्रह गरेका छन् । सडकको दायाँबायाँ १६/१६ मिटर मात्र विस्तार गर्ने हो भने मुआब्जाको दावी नगर्ने र सडक विस्तारको काममा सघाउने उनले बताए । सडकको केन्द्र विन्दुबाट २५/२५ मिटर विस्तार गर्ने हो भने मुआब्जा नपाएकाहरुको हकमा सरकारले उचित मुआब्जा दिनुपर्ने उनले बताए ।
सबैलाई बिचल्ली पार्ने गरी सरकार प्रस्तुत हुनुभएन, उनले भने । उनले यदि, यसमा अझै समस्या भए आफूहरु सम्मानित अदालतको अन्तिम आदेश मान्न तयार रहेको प्रतिक्रिया दिए । यदि राज्य २५ /२५ मिटर नै विस्तार गर्ने निश्कर्षमा पुगेको हो भने यो स्वीकार गर्न सकिँदैन, अदालतको आदेश पर्खिन आग्रह गर्छौ, कटुवालको भनाई छ ।
सरकारले पेलेर सडक विस्तार गर्ने हो भने त्यसले निकै समस्या ल्याउने उनले बताए । हामी विकास विरोधी होइनौँ, तर बिना मुआब्जा नागरिकलाई घरबारबिहीन बनाउँदा सबै सरोकारवालाहरुले सोचिदिनुपर्छ, कटुवालले भने । ]
हजारौँ व्यवसायी र घरधनी पीडित बन्ने अवस्था छ, कटुवालले भने – सामान्य नागरिकको अधिकारको सुरक्षा सबैको चासोको विषय होइन र ?