हेटौंडा राजधानी टुंगिएपछि १६/१६ मिटर भत्किने

तु खबर संवाददाता
२०७६ पुष २३,बुधबार १३:५५

हेटौंडा, २३ पुस । प्रदेश ३ को राजधानी हेटौंडा र नाम बाग्मती रहने लगभग निश्चित भएको छ । नेकपा सचिवालयको निर्देशन मानेर सांसदहरु हेटौंडालाई राजधानी र नाम बाग्मती राखेर अघि बढ्ने संकेत देखा परेको छ ।

सत्तारुढ दल नेकपा नेतृत्वले पुनः राजधानी हेटौंडा र नाम बाग्मती मानेर जान निर्देशन दिएपछि प्रदेशसभा सदस्यहरु सकारात्मक देखिएका हुन् । राजधानी विवाद टुंगिने देखिएको छ । राजधानी सँगसँगै हेटौंडाको सडक विस्तार विवाद पनि टुंगिने संकेत देखिएको छ ।

प्रदेश ३ को राजधानी हेटौंडा कायम हुँदा हेटौंडा बजारको सडक विस्तार हुने संकेत देखा परेको छ । विगत लामो समयदेखि हेटौंडाको मुख्य सडक फराकिलो पार्न प्रयास भएका छन् । तर, राजनीतिक नेतृत्वकै कारण सडक विस्तार रोकिँदै आएको थियो ।

गत हप्ता शुक्रबारदेखि आइतबारसम्म मुख्यमन्त्री निवासमा भएको नेकपा संसदीय दलको बैठकमा हेटौंडाको सडकको विषयमा कुरा उठेको थियो । केही सांसदले हेटौंडाको सडक साँघुरो भएको भन्दै राजधानीको लागि उपयुक्त नभएको धारणा राखेका थिए ।

सोमबार बसेको प्रदेशसभा बैठकमा बोल्दै एक सांसदले यहाँको सडकदेखि भौतिक संरचनाको विषयमा प्रश्न उठाएका थिए । यसअघि पनि सार्वजनिक कार्यक्रमहरुमा हेटौंडाको सडकको विषयमा नकारात्मक टिक्का टिप्पणी हुने गरेको थियो ।

प्रदेश ३ का मुख्यमन्त्री डोरमणि पौडेललाई पनि राजधानी हेटौंडा कायम भएपछि सडक विस्तार गरेर व्यवस्थित बनाउन नैतिक दबाब परेको एक प्रदेशसभा सदस्यले बताए ।

‘मुख्यमन्त्रीले पहिला हेटौंडाको सडक विस्तार गरेर व्यवस्थित गर्नुपर्छ । अहिल्यै देखि हेटौंडामा सवारी जाम हुन थालिसक्यो । मुख्यमन्त्रीलाई नैतिक दबाब परेको छ ।–’ तु खबरसँग कुरा गर्दै एक सांसदले भने ।

मुख्यमन्त्री पौडेलले हेटौंडा बजार १६/१६ मिटर दायाँबायाँ भत्किने उद्घोष गरिसकेका छन् । केही समयअघि थाहासञ्चार रोडियोको कार्यक्रममा बोल्दै उनले हेटौंडाको सडक २५ मिटर नभई १६/१६ मिटर फराकिलो पारिने बताएका थिए ।

उनले आफू सडक विस्तारको विरोधी नभएको भन्दै पहिला आफ्नै घर भत्काएर सडक फराकिलो पार्ने काम सुरु गर्ने बताएका थिए । मुख्यमन्त्रीको उद्घोष र प्रदेश सांसदहरुको सडक विस्तार गर्नुपर्ने दबाबले पनि अब हेटौंडा बजारको मुख्य सडक फराकिलो हुने संकेत देखिएको हो ।

केही समयअघि डिभिजन सडक कार्यालय, हेटौंडालाई पूर्व–पश्चिम राजमार्गको पथलैयादेखि चतिवनको लोथरसम्म २५/२५ मिटर सडक फराकिलो पार्न सुरु गरेको थियो ।

राजनीतिक दबाबका कारण सडक विस्तार रोकिएको थियो । उक्त सडक विस्तार गर्नुपर्ने कार्य अहिलेसम्म पनि सुरु हुन सकेको छैन ।

यो पनि पढ्नुहोस्

यसमा तपाइको मत

Your email address will not be published. Required fields are marked *


*


ताजा समाचार

१
विपद्को घटनामा परेर १३९ जनाको मृत्यु
२
विमान दुर्घटनामा मृत्यु भएकाको शव आफन्तलाई जिम्मा लगाउन सुरु
३
खोलाले बगाउँदा दुई जना किशोरीको मृत्यु
४
वैदेशिक रोजगारीमा जाने विना धितो ऋण पाइने
५
आर्थिक वर्ष २०८१–०८२ को मौद्रिक नीति सार्वजनिक