बच्चा हुर्किएर स्कूल जान थालिसक्यो, न्वारन गर्नुपर्दैन : स्थापित
तु खबर संवाददाता
मकवानपुर, १४ वैशाख । प्रदेश नं. ३ का तत्कालिन भौतिक योजना मन्त्री केशब स्थापितले प्रदेशको नामाकरण गर्न नसकेको प्रति सरकारको आलोचना गरेका छन् । शनिबार बिहान तु खबरसँग कुराकानी गर्दै स्थापितले बच्चा हुर्किएर स्कूल जान थालिसक्दा पनि न्वारन गर्न नसकिएकोमा आश्चर्य व्यक्त गरे ।
प्रदेश नम्बर ३ को राजधानी टुङ्गो लगाउन तत्काल प्रकृयामा लैजानु पर्ने धारणा राख्दै उनले न्वारन गर्ने काम पनि थाती राख्न नहुने सुझाव दिए । जन्मिएर, हुर्किएर बच्चा स्कूल जान थालिसकेको भएपनि उसको न्वारन नहुनु दुखद भएको स्थापितको भनाई छ ।
मन्त्रीको सपथ लिएको दिन हेटौंडाको सडक १ सय दिनमै बिस्तार गर्ने बताएका स्थापितले तु खबरसँग भने १६ /१६ मिटर विस्तार गर्नुपर्ने बताए । रातोमाटेदेखि राप्तीपुलसम्म बाइपास बनाउनुपर्ने उनको तर्क छ । खोलाको तीरैतीर बस्तीपुरसम्म अर्को बाटो निकाल्नुपर्ने उनले बताए । मुख्यमन्त्रीज्युले गर्नुपर्ने हो, उहाँले जान्ने विषय हो, उनले भने ।
प्रदेशको राजधानी कहाँ रहन्छ त भनी उनलाई सोधिएको थियो । उनले राजधानी र के नाम राख्ने भन्ने दुबै विषयमा आफू नबोल्ने बताए । प्रकृयामा लगिहाले सबै टुङ्गो लाग्ने भन्दै उनले नबोली पनि धेरै कुरा भन्न सकिने बताए । केही दिनअघि नेकपाको कार्यक्रममा मञ्चबाटै उठेर हिँडेका माधबकुमार नेपालको नाम लिँदै उनले उहाँ नबोली हिड्नु भयो, तर धेरै कुरा बोल्नु भयो नि हैन ?