मुख्यमन्त्री बानियाँलाई विश्वासको मत दिन काँग्रेसको ह्विप

हेटौंडा । नव नियुक्त मुख्यमन्त्री इन्द्र बहादुर बानियाँलाई विश्वासको मत दिन नेपाली काँग्रेस संसदीय दलले ह्विप जारी गरेको छ । आज काठमाडौंमा बसेको संसदीय दलको बैठकमा मुख्यमन्त्री बानियाँको पक्षमा विश्वासको मत दिन, तटस्थ नबस्न र अनुपस्थित नहुन ह्विप जारी गरिएको काँग्रेस बागमती प्रदेशले जनाएको छ ।

साउन २७ गते मुख्यमन्त्री बानियाँले नेपालको संविधानको धारा १६८ को उपधारा (४) तथा प्रदेश सभा नियमावली, २०७४ को नियम १४३ को उपनियम (१) बमोजिम विश्वासको मत लिने तयारी गरेका छन् । सोही प्रयोजनका लागि प्रदेशसभा सचिवालयले दिउँसो ४ बजेका लागि बैठक बोलाएको छ ।

नेपालको संविधान अनुसार, मुख्यमन्त्री नियुक्त भएको ३० दिनभित्र विश्वासको मत लिनुपर्ने व्यवस्था छ । सोही व्यवस्था बमोजिम नव नियुक्त मुख्यमन्त्री बनियाँले विश्वासको मत लिने तयारी गरेको प्रमुख स्वकीय सचिव मिलन पुडासैनीले जानकारी दिए ।

नेकपा एमाले र नेपाली काँग्रेसको प्रस्तावमा प्रदेश प्रमुख दीवक प्रसाद देवकोटाले बानियाँलाई मुख्यमन्त्री नियुक्त गरेका हुन् । यसअघि बहादुर सिंह लामा विरुद्ध काँग्रेस संसदीय दलको बैठकमा अविश्वासको प्रस्ताव दर्ता भई पारित भएपछि लामा संसदीय दलको नेतामा पराजीत भएका थिए । पछि बानियाँ २२ मत प्राप्त गरी दलको नेता निर्वाचित भएका थिए । काँग्रेस संसदीय दलका नेता बानियाँलाई मुख्यमन्त्री नियुक्त गर्न प्रस्ताव भएको थियो ।