देउवालाई विश्वासको मत नदिने एमाले स्थायी कमिटीको निर्णय
तु खबर संवाददाता
काठमाडौं । नेकपा एमालेको स्थायी कमिटी बैठकले सरकारलाई समर्थन नगर्ने र विस्वासको मत नदिने निर्णय गरेको छ ।
एमाले अध्यक्ष केपी शर्मा ओली पक्षका नेताहरुको मात्र उपस्थिति रहेको सो बैठकले कांग्रेस सभापति शेरबहादुर देउवा नेतृत्वको सरकारलाई विश्वासको मत नदिने निर्णय गरेको हो ।
नेकपा एमालेले पार्टी एकता गर्न बनेको १० सदस्यीय कार्यदल समेत बैठकले खारेज गर्ने निर्णय गरेको छ ।
त्यस्तै बैठकले देउवा नेतृत्वको सरकारको विपक्षमा उभिन आफ्ना सांसदहरुलाई निर्देशन दिएको छ ।
त्यस्तै अध्यक्ष केपी ओली नेतृत्वको सरकारले ऐतिहासिक काम गरेको भन्दै बैठकले धन्यवाद व्यक्त गरेको छ ।
एमालेका बरिष्ठ नेता माधव नेपालले स्थायी कमिटीको बैठक रोक्न अस्वीकार गरेपनि ओलीले बैठक संचालन गरेका हुन् ।
स्थायी समिति बैठक केही दिन रोक्न र पार्टी एकतामा जोड दिन माग गर्दै उपाध्यक्ष भीम रावल, सुरेन्द्र पाण्डे, भीम आचार्य, घनश्याम भुषाल लगायतका नेताहरू ललितपुरस्थित तुलसीलाल अमात्य प्रतिष्ठान पुगेका थिए ।
बैठकस्थल पुगेर रावल लगायतका नेताहरूले पार्टी एकता जोगाउन र कार्यदलको प्रस्ताव कार्यान्वयन गर्न अध्यक्ष ओलीलाई आग्रह गरेका थिए । तर ओलीले बैठक नरोक्ने अडान दोहोर्याउँदै बैठक जारी राखेका थिए । त्यसपछि रावल लगायतका नेताहरू बैठकस्थलबाट बाहिरिएका हुन् ।
बैठकस्थलबाट बाहिरिने क्रममा उपाध्यक्ष भीम रावलले एमाले एकता प्रक्रिया थप जटिल बन्दै गएको प्रतिक्रिया दिएका छन् ।
अध्यक्ष ओलीले शीर्ष तहमा वार्ता गरेर स्थायी कमिटी र आवश्यक परे अन्य कमिटीको बैठक बोलाउनुपर्ने कार्यदलको सुझावविपरीत बैठक राखेर पार्टी एकतालाई जटिल मोडमा पुर्याएको माधव पक्षका सांसदहरुले आरोप लगाए ।