रवि लामिछाने रिहाइ मुद्दामा उच्चले माग्यो कैफियत प्रतिवेदन
तु खबर संवाददाता२०८२ भाद्र ११, बुधबार १४:०७
राष्ट्रिय स्वतन्त्र पार्टी (रास्वपा) का सभापति रवि लामिछानेको रिहाइ माग सम्बन्धी निवेदनमा उच्च अदालत तुलसीपुर, बुटवल इजलासले कैफियत प्रतिवेदन झिकाउने आदेश दिएको छ ।
लामिछानेकी पत्नी निकिता पौडेलले दायर गरेको रिट निवेदनमा बुधबार न्यायाधीश सागर विष्टको इजलासमा सुनुवाइ सम्पन्न भएको हो । निवेदनमा लामिछानेले बिगोबमोजिमको धरौटी बुझाएर रिहाइ गर्न माग गरेका थिए ।
सुनुवाइपछि अदालतले मुद्दामा कैफियत प्रतिवेदन माग गर्ने आदेश दिएको छ । अब उक्त प्रतिवेदन प्राप्त भएपछि अर्को सुनुवाइ हुने भएको छ ।
यसअघि रुपन्देही जिल्ला अदालतले सोही प्रकृतिको निवेदनमा ‘मागबमोजिम आदेश दिन नमिल्ने’ आदेश दिएको थियो । त्यसपछि लामिछाने उच्च अदालत पुगेका हुन् ।
सुप्रिम सहकारी ठगी प्रकरणमा लामिछाने विगत चार महिनादेखि थुनामा छन् । हाल उनी नख्खु कारागारमा रहेका छन् ।
