मकवानपुरका १४३ जनामा डेंगु संक्रमण पुष्टि, हेटौंडामा मात्रै १०४
तु खबर संवाददाता
मकवानपुर । मकवानपुर जिल्लाका १ सय ४३ जनामा डेंगु संक्रमण पुष्टि भएको छ ।
उक्त तथ्याङ्क साउन १ गतेदेखि भदौ ९ गते आइतबार दिउँसोसम्मको रहेको जनस्वास्थ्य कार्यालय मकवानपुरले जनाएको छ ।
जनस्वास्थ्य कार्यालयका अनुसार, डेंगु संक्रमण पुष्टि हुनेमा ७९ जना महिला र ६४ जना पुरुष रहेका छन् ।
सो अवधिमा जिल्लाको हेटौंडा उपमहानगरपालिकामा ४५ पुरुष र ५९ महिला गरी १०४ जना, मकवानपुरगढी गाउँपालिकाका ४ पुरुष र ४ महिला गरी ८ जना, बागमती गाउँपालिकाका एक जना पुरुष, कैलाश गाउँपालिकाका एक पुरुष, मनहरी गाउँपालिकाका १० पुरुष र ६ महिला गरी १६ जनामा डेंगु संक्रमण पुष्टि भएको छ ।
यसैगरी, बकैया गाउँपालिकाका ३ पुरुष र ३ महिला गरी ६ जना, भीमफेदी गाउँपालिकाका ३ जना महिला, ठेगाना नखुलेको एक महिला र अन्य जिल्लाका ३ महिलामा डेंगु संक्रमण पुष्टि भएको छ ।
जिल्लामा सो अवधिमा डेंगु संक्रमणका कारण कुनै पनि व्यक्तिको निधन नभएको जिल्ला स्वास्थ्य कार्यालयले जानकारी दिएको छ ।