एमालेको कार्यक्रममा ओलीको बाहेक अरु नेताको फोटो राख्न नपाइने

काठमाडौँ । नेकपा एमालेले आयोजना गर्ने सार्वजनिक कार्यक्रमहरुमा केपी शर्मा ओलीको मात्रै फोटो राख्न पाइने भएको छ ।

एमालेले पार्टी र मातहतका सार्वजनिक कार्यक्रमलाई छरितो र व्यवस्थित बनाउन बनाएको मापदण्डमा सो कुरा उल्लेख छ ।

पार्टीका कार्यक्रमको गरिमा र मर्यादालाई बढाउन पार्टीका कमिटी तथा जनसङ्गठनले आयोजना गर्ने सार्वजनिक कार्यक्रममा पार्टीका अध्यक्ष बाहेक अन्य नेताका तस्बिर प्रयोग नगर्ने, मञ्चको प्रयोग वक्ताले मात्र गर्ने, अतिथि तथा वक्तालाई दर्शक दीर्घामा नै मर्यादित ढङ्गले आसनको व्यवस्था मिलाउने र कार्यक्रमको अन्तिमसम्म आसन ग्रहण गराइने परम्परा अन्त्य गर्ने मापदण्ड बनाइएको छ ।

यस्तै कार्यक्रममा ब्याच, माला र खाँदाको अनावश्यक प्रयोग नगर्ने तथा कार्यक्रमलाई भड्किलो नबनाउने एमालेको निर्णय छ ।
कार्यक्रमहरुमा स्वर्गीय नेताहरुको भने फोटो राख्न पाइने एमालेले जनाएको छ ।