सन् २०३० को गन्तव्य भेटाउन सामूहिक कार्य गर्न इकोसक अध्यक्ष थापाको आह्वान

संयुक्त राष्ट्र संघको आर्थिक तथा सामाजिक परिषद्का अध्यक्ष एवं तथा नेपालका स्थायी प्रतिनिधि लोक बहादुर थापाले वर्तमान विश्वमा शान्ति, समृद्धि र दिगोपनालाई अलग-अलग गरेर हेर्न नसकिने बताएका छन् ।

न्यूयोर्कमा आयोजित सन् २०२६ को दिगो विकासका लागि  उच्चस्तरीय राजनीतिक मञ्चको उद्घाटन सत्रलाई सम्बोधन गर्दै अध्यक्ष थापाले दिगो विकास लक्ष्य हासिल गर्नका लागि परम्परागत शैलीभन्दा फरक ढंगले सामूहिक र एकीकृत रूपमा काम गर्नुपर्नेमा बताए ।

सन् २०३० को कार्यसूची पूरा गर्न अब पाँच वर्षभन्दा कम समय बाँकी रहेको स्मरण गराउँदै उनले कार्यान्वयन प्रक्रियालाई तीव्र बनाउन अझ बलियो साझेदारी र प्रभावकारी अन्तर्राष्ट्रिय सहयोगको आवश्यकता समेत औंल्याए ।

अध्यक्ष थापाले विश्वभर बढ्दै गएका द्वन्द्व, तीव्र जलवायु परिवर्तन, वित्तीय दबाब र ऋणको भारले विकासका प्रयासहरूलाई संकुचित बनाउँदै लगेको प्रति चिन्ता व्यक्त गरे । उनले विज्ञान, प्रविधि र आर्टिफिसियल इन्टेलिजेन्समा भएको द्रुत विकासले अभूतपूर्व अवसरहरूसँगै नयाँ चुनौती र विभाजनहरू पनि सिर्जना गरेको बताए । यी संकटहरूको भार सबै देशमा समान नभएको चर्चा गर्दै थापाले विशेष गरी अति कम विकसित, भूपरिवेष्ठित विकासोन्मुख र साना टापु राष्ट्रहरूले असमान वित्तीय दबाब र आपूर्ति शृङ्खलाको अवरोध भोगिरहेको तर्फ विश्व समुदायको ध्यानाकर्षण समेत गराए ।

सम्बोधनका क्रममा उनले दिगो विकास लक्ष्यहरू ६, ७, ९, ११ र १७ को बहुआयामिक महत्त्वमाथि प्रकाश पार्दै जल सुरक्षा, सरसफाइ र स्वच्छ ऊर्जाको पहुँच मर्यादा र समानताको आधार मात्र नभएर समग्र विकासकै केन्द्रीय स्तम्भ भएको थापाको जोड थियो ।

अर्बौँ मानिस अझै पनि आधारभूत सेवाबाट वञ्चित रहनु गम्भीर विकासात्मक र नैतिक अन्याय भएको बताउँदै थापाले सुरक्षित शहर र समतामूलक प्रविधि हस्तान्तरणका लागि डिजिटल सार्वजनिक पूर्वाधार र नवप्रवर्तनलाई पुलको रूपमा प्रयोग गर्नुपर्ने धारणा राखे ।