राष्ट्रियसभामा झाँक्रीको प्रश्न : भदौ २४ गतेको घटनाको छानबिन गर्ने काममा किन ढिलाई

नेकपा एमाले राष्ट्रिय सभाकी सदस्य रामकुमारी झाँक्रीले भदौ २४ गतेको घटनाको छानबिन गर्ने काममा किन ढिलाई भएको हो भनेर प्रश्न गरेकी छिन् । राष्ट्रिय सभा बैठकमा उनले २४ गते जलाइएका सिंहदरबारलगायत घटनाको सत्यतथ्य बाहिर ल्याउने काममा ढिलाइ भइरहेको भन्दै यसको निश्पक्ष छानबिन गर्न माग गरेकी छिन् ।

भदौं २४ को घटनाको निष्पक्ष छानबिन कहिले हुन्छ र घटनाबारे प्रतिवेदन कहिले आउँछ, उनले भनिन् । घटनाको तथ्य सार्वजनिक गर्न उनले माग राखेकी छिन् ।

गत भदौ २४ गते जेन जी आन्दोलनका क्रममा संसद् भवन, सिंहदरबार, सर्वोच्च अदालतलगायतका सयौं सरकारी संरचनाहरुमा आगो लगाइएको थियो ।

सरकारले गठन गरेको छानबिन समितिले २३ गतेको विद्यार्थीहरुमाथि गोली चलाएको घटनामा मात्र केन्द्रीत भई तत्कालिन प्रधानमन्त्री, गृहमन्त्री लगायतकालाई दोषी ठहर्याउँदै कारवाहीका लागि सरकारलाई सिफारिस गरेको थियो । सोही सिफारिसका आधारमा सरकारको निर्देशनमा तत्कालिन प्रधानमन्त्री केपी शर्मा ओली र गृहमन्त्री रमेश लेखकलाई पक्राउ गरिएको थियो ।

राष्ट्रियसभामा केही प्रश्नहरु छोड्नुपर्ने बताउँदै झाँक्रीले सबै ठिकठाक थियो कि थिएन र सबै खराब थिए कि थिएनन् भन्ने बारे चर्चा आवश्यक रहेको बताएकी छिन् ।

कुनै पनि सत्ताको विरुद्ध नागरिकलाई शान्तिपूर्ण रुपमा विरोध गर्ने अधिकार रहन्छ, तर भदौं २३ र २४ को घटनाको उत्तर कसले खोज्ने, उनले प्रश्न गरिन् । नवयुवालाई यो ढंगले कसले प्रयोग गर्यो, यसको जवाफ राष्ट्रियसभाले खोज्नेछ, उनले भनिन् ।