राप्रपाबाट झविन्द्र फुल्लेलको अर्घाखाँचीमा उम्मेदवारी दर्ता

काठमाडौं। आगामी फागुन २१ गते हुने प्रतिनिधिसभा निर्वाचनका लागि राष्ट्रिय प्रजातन्त्र पार्टी (राप्रपा) अर्घाखाँचीको तर्फबाट झविन्द्र फुल्लेलले उम्मेदवारी दर्ता गराएका छन्।

पार्टी कार्यालयमा भेला भएका नेता-कार्यकर्ता र समर्थकहरूसँगै र्‍यालीसहित निर्वाचन अधिकृतको कार्यालय पुगेर फुल्लेलले आफ्नो उम्मेदवारी दर्ता गराएका हुन्।

गणतन्त्र खारेजी, हिन्दु राष्ट्र पुनर्स्थापना र संवैधानिक राजतन्त्र स्थापनाको एजेन्डा बोकेर चुनावी मैदानमा उत्रिएका फुल्लेल राप्रपा अर्घाखाँचीका कार्यबाहक अध्यक्ष हुन्। यसअघि उनले प्रदेशसभा निर्वाचनमा अर्घाखाँची ‘क’ बाट पनि प्रतिस्पर्धा गरिसकेका छन्।

आफ्ना राजनीतिक एजेन्डामा अडिग र विपक्षीका खरो आलोचकका रूपमा चिनिँदै आएका फुल्लेलले यसपटक प्रतिनिधिसभा निर्वाचनमार्फत पार्टीका मूल मुद्दालाई जनतासमक्ष बलियो ढंगले प्रस्तुत गर्ने बताएका छन्।

र्‍यालीका क्रममा राप्रपाका समर्थकहरूले पार्टीका नारा र झन्डा प्रदर्शन गर्दै उत्साहजनक सहभागिता जनाएका थिए। निर्वाचन नजिकिँदै जाँदा अर्घाखाँचीको राजनीतिक माहोल थप तातिँदै गएको छ।