मोटरसाइकल दुर्घटना हुँदा दुई जनाको मृत्यु

धनगढी । कैलालीमा सावरी दुर्घटना हुँदा दुई जनाको मृत्यु भएको छ ।

पूर्व–पश्चिम राजमार्ग अन्तरगत गौरीगंगा नगरपालिका–१ को गोप्कामा पश्चिमबाट पूर्वतर्फ गइरहेको से ६ प ६२७९ र विपरीत दिशाबाट आइरहेको बा ९५ प ९२५२ नम्बरको मोटरसाइकल एकापसमा ठोक्किएर दुर्घटना हुँदा दुई जनाको मृत्यु भएको हो ।

मृत्यु हुनेहरुमा जानकी गाउँपालिका–८ बस्ने २० वर्षीय निर्मल चौधरी र कञ्चनपुरको शुक्लाफाँटा नगरपालिका–७ का २६ वर्षीय चिरञ्जीवी मल्ल रहेको जिल्ला प्रहरी कार्यालय धनगढीले जनाएको छ ।

प्रहरीका अनुसार, मृतक दुबै जना मोटरसाइकल चालक हुन् । चौधरी से ६प ६२७९ नम्बरको मोटरसाइकल र मल्ल बा ९५ प ९२५२ नम्बरको मोटरसाइकलका चालक हुन् ।

दुर्घटनामा गम्भीर घाइते भएका दुवै जनालाई राति नै धनगढीको नवजीवन अस्पताल लगिएकोमा चिकित्सकले मृत घोषण गरेको जनाइएको छ ।

उनीहरूको शव परीक्षणका लागि सेती प्रादेशिक अस्पतालमा राखिएको छ ।

यस्तै, उक्त दुर्घटनामा परेर बा ९५ प ९२५२ नम्बरको मोटरसाइकल पछाडि सवार कञ्चनरको शुक्लाफाँटा नगरपालिका– ७ का २२ वर्षीया दिपक बोहोरा घाइते भएका छन् । बोहोराको नवजीवन अस्पतालमा उपचार भइरहेको छ ।