पहिरोले बगाउँदा बेपत्ता भएका नेपाली सेनाका कर्णेलको मृत्यु

काठमाडौं । पहिरोमा परेर बेपत्ता नेपाली सेनाका बहालवाला कर्णेल (सहायक रथी) मिलन केसीको मृत्यु भएको छ ।

दोलखाको भीमेश्वर नगरपालिका निवासी केसीको पहिरोमा परेर मृत्यु भएको जनाइएको छ ।

उनी शनिबार सिन्धुपाल्चोकको सुनकोसी गाउँपालिकाको सुकुटेस्थित सिन्धु बिज रिसोर्ट पहिरोले बगाउँदा बेपत्ता भएका थिए । बेपत्ता उनको खोजीकार्य क्रममा शव फेला परेको हो ।

शनिबार उक्त रिसोर्ट पहिरोले बगाउँदा ४ जना बेपत्ता भएका थिए । केही घण्टापछि २ जनाको शव भेटिएको थियो ।

भक्तपुर खरीपाटीमा कार्यरत केसी कोरियन साथीहरूसँगै रिसोर्टमा थिए । रिसोर्ट बगेपछि उनी साथीको उद्धार गर्ने क्रममा बेपत्ता भएको बुझिइएको छ ।