बागमतीको खेल विज्ञमा श्रेष्ठ मनोनित

मकवानपुर । बागमती प्रदेशको युवा तथा खेलकुद मन्त्रालयले दीपक श्रेष्ठलाई खेल विज्ञ मनोनित गरेको छ ।

खेलकुद मन्त्री मीनकृष्ण महर्जनले ललितपुरको गोदावरी–११ निवासी श्रेष्ठलाई बुधबार खेल विज्ञ मनोनित गरेका हुन् ।

श्रेष्ठलाई बागमती प्रदेशको समग्र खेल क्षेत्रको विकासका लागि सल्लाह सुझाव दिन र आवश्यक विभिन्न खेलकुदसँग सम्बन्धित गतिविधि संचालन गर्न उक्त जिम्मेवारी प्रदान गरिएको मन्त्री महर्जनले जानकारी दिए ।

श्रेष्ठ खेलाडीहरुको हकहितका लागि लामो समयदेखि काम गर्दै आएको राष्ट्रिय तथा अन्तर्राष्ट्रिय खेलाडी संघका अध्यक्षसमेत हुन् । उनी वि.स. २०४९ सालदेखि खेलकुद क्षेत्रमा क्रियाशील रहेका छन् ।

दक्षिण एसियाली खेलकुद (साग) मा लगातार दुई पटक स्वर्ण पदक विजेता श्रेष्ठले सक्रिय खेलाडीबाट अवकाशपश्चात् पनि राष्ट्रिय टिम प्रशिक्षकको जिम्मेवारी बहन गरी राष्ट्रको लागि पदक जित्ने सफल खेलाडी उत्पादनमा योगदान पुर्याउँदै आएका छन् ।

उनले पछिल्लो समय राष्ट्रिय खेलकुद परिषद् राष्ट्रिय टिम तयारी समितिको उपनिर्देशक तथा नेपाल कराते महासंघको सहायक मुख्य प्रशिक्षकको जिम्मेवारी पनि सम्हाल्दै आएका छन् ।

उनले प्रदेशको समग्र खेलकुद क्षेत्रको विकास र खेलकुदको स्तर बढाउने तथा संरचनागत र जनशक्ति विकासको कार्यक्रमलाई तीब्रता दिइने प्रतिबद्धता जनाए ।