संयुक्त राष्ट्रमा नेतन्याहुको आक्रामक भाषण
तु खबर संवाददाता
इजरायलका प्रधानमन्त्री बेन्जामिन नेतन्याहुले शुक्रबार संयुक्त राष्ट्र महासभामा आक्रामक भाषण गर्दै हालै पश्चिमी मुलुकहरूले दिएको प्यालेस्टाइन राज्य मान्यतालाई तीव्र आलोचना गरेका छन् । उनले फ्रान्स, बेलायत, क्यानडा, अष्ट्रेलियासहितका युरोपेली मुलुकहरूको कदमलाई “लज्जाजनक र लज्जास्पद” भन्दै अस्वीकार गर्दै “कट्टरपन्थीहरूलाई अन्तिम इनाम” दिएको आरोप लगाए ।
गाजामा इजरायलको युद्धलाई लिएर बढ्दो आलोचनालाई अस्वीकार गर्दै नेतन्याहुले यसलाई “राजनीतिक र कानुनी युद्ध” को हिस्सा बताए । उनले अमेरिकी राष्ट्रपति डोनाल्ड ट्रम्पको प्रशंसा गर्दै इजरायल र अमेरिकाले साझा खतरालाई अरू भन्दा राम्ररी बुझ्ने टिप्पणी गरे ।
इरानविरुद्ध कडा प्रहार गर्दै नेतन्याहुले आणविक कार्यक्रम रोक्न ‘स्न्यापब्याक प्रतिबन्ध’ को आह्वान गरे । उनले गाजामा इजरायली सेनाले आफ्नो भाषण प्रत्यक्ष प्रसारण गरेको दाबी गरे पनि स्थानीयवासीले त्यसको सन्देश नपाएको बताएका छन् ।
युद्ध जारी राख्ने आफ्नो अडान दोहोर्याउँदै नेतन्याहुले हमास नष्ट नभएसम्म संघर्ष अन्त्य नहुने स्पष्ट पारे । तर, ट्रम्प प्रशासनले भने युद्धविराम प्रस्तावसहित २१ बुँदे शान्ति योजना अघि सारेको छ, जसले गाजाबाट इजरायली सेनाको चरणबद्ध फिर्ता र ४८ घण्टाभित्र सबै बन्धक मुक्त गर्ने प्रावधान राखेको छ ।
युद्ध अन्त्यका लागि अन्तर्राष्ट्रिय दबाब बढिरहेका बेला नेतन्याहुको ‘जिद्दी अडान’ र ट्रम्पको ‘शान्तिपूर्ण समाधान’ बीच स्पष्ट विरोधाभास देखिएको छ ।
