पुँजी बजारमा गिरावट नेप्से २७८१ बिन्दुमा झर्यो

काठमाडौँ । दशैं नजिकिँदै गर्दा शेयर बजारमा आज भारी गिरावट आएको छ । गत तीन दिन लगातार बढेको बजारले लगानीकर्तामा उत्साह जगाएको भए पनि पर्वको समयमा पैसाको जोहो सुरु भएपछि धेरैले आफ्ना शेयर बिक्री गरी नाफा बुक गर्न थालेका छन् । यस कारण बजारमा अचानक घटबढ देखिनु स्वाभाविक रहेको छ ।
तर केही विश्लेषक र अनुभवी लगानीकर्ताहरूले बजारमा अझै माफियाहरूको चलखेल हुन सक्ने चेतावनी दिएका छन् । उनीहरूको बुझाइमा ३००० बिन्दु पार गरेको बजारलाई ३२०० माथि जाने आशामा लगानीकर्तालाई भ्रमित पार्ने गतिविधि भइरहेको छ । त्यसैले विशेषज्ञहरूले बलियो कम्पनीको शेयरमा मात्र लगानी गर्न र बजारमा प्रवेश गर्नु अघि वित्तीय अवस्था, कम्पनीको नाफा क्षमता र बजारको समग्र अवस्था राम्ररी बुझ्न सुझाव दिएका छन् ।
बैंक तथा वित्तीय संस्थाहरूले सार्वजनिक गरेका २०८१/०८२ आर्थिक वर्षका वित्तीय विवरणले अधिकांश कम्पनीको वित्तीय अवस्था बलियो रहेको देखाएको छ भने लाभांश क्षमता पनि सुधारिएको छ । यस्तो सकारात्मक तथ्यले बजारमा लगानीकर्ताको आत्मविश्वास बढाउन सक्थ्यो, तर अहिलेको भारी गिरावटले बजार अझै अस्थिर र माफियाहरूको चलखेलको जोखिम पूर्ण रूपमा हटेको छैन । यसले गर्दा लगानीकर्ताले सतर्क रहँदै दीर्घकालीन दृष्टिकोण अपनाउनु जरुरी देखिन्छ ।
नेपाल स्टक एक्सचेञ्ज (नेप्से) ३७.१० अकंले घटेर २७८१ बिन्दुमा कायम भएको छ । आज ३२२ कम्पनीको १ करोड ७८ लाख ९१ हजार कित्ता शेयर किनबेच हुँदा ८ अर्ब ९ करोड ५६ लाख १० हजार रुपैयाँको कबारोबार भएको हो ।
यसदिन १२ उपसूचक राताम्य भएको देखिएको छ । आज सर्वाधिक शेयर मूल्य घट्नेमा विकास बैंक र फाइनान्सका लागनीकर्ताहरु रहेको छन् । बिहिबार विकास बैंकको शेयर मूल्य २.४३ प्रतिशत र फाइनान्स समूहको शेयर मूल्य १.८३ प्रतिशतले घटेको हो । साथै, होटल तथा पर्यटन समूहको १.६८ प्रतिशत, हाइड्रोपावर समूहको १.४३ प्रतिशत, इन्भेष्टमेन्ट समूहको १.५५ प्रतिशतले शेयर मूल्य घटेको हो ।
बिहिबार २४ कम्पनीको शेयर मूल्य बढेको छ भने २२७ कम्पनीको घटेको छ ।