साहित्यकार सञ्जय साह मित्र र छवि अनित्य सम्मानित

मकवानपुर । साहित्य संगम मकवानपुरले तु खबर डटकमका स्तम्भकार अग्रज साहित्यकार एवम् पत्रकार सञ्जय साह मित्रलाई आज एक कार्यक्रमका बीच भैरव अर्याल स्मृति सम्मान २०७९ प्रदान गरेको छ । नेपाल प्रज्ञा प्रतिष्ठानका कुलपति भुपाल राईको प्रमुख आतिथ्य एवम् सस्थाकी अध्यक्ष अनिता न्यौपानेको अध्यक्षतामा भएको कार्यक्रममा साहलाई नगद २१ हजार १ सय ११ रुपैयाँ राशीको सम्मान प्रदान गरिएको हो ।

त्यसैगरी, तु खबर डटकमकै सम्पादन विभागमा आवद्ध साहित्यकार छवि अनित्यलाई रामहरि देवु युवा साहित्य सम्मान प्रदान गरिएको छ । नगद १० हजार १ राशीको यो पुरस्कार साहित्यकार तथा अधिवक्ता ऋषि केवी र उनकी धर्मपत्नी पुण्यशीला श्रेष्ठले स्थापना गरेका हुन् ।

हेटौंडामा आजबाट सुरु भएको दुई दिने साहित्य महोत्सवमा साह र श्रेष्ठसहित  साहित्यकार मनु मञ्जिललाई डम्बर पुर्णमाया स्मृति कविता सम्मान, साहित्यकार महेश पौडेललाई साहित्य संगम मकवानपुर कृति सम्मान, साहित्यकार पूर्णकला घिमिरेलाई शुभद्रादेवि मदन मुडभरी स्मृति सम्मान, साहित्यकार एसके निधनलाई मुक्तितारा सम्मान प्रदान गरिएको छ ।