स्ववियु चुनावमा भोटिङ मेसिन प्रयोग हुने
तु खबर संवाददाता२०७९ चैत्र ३,शुक्रबार १५:३८
काठमाडौं । चैत्र ५ गते हुने स्ववियु निर्वाचनमा त्रिवि केन्द्रीय क्याम्पसमा भोटिङ मेसिन प्रयोग गरिने भएको छ । आइतबार हुने स्ववियु निर्वाचनमा भोटिङ मेसिन प्रयोग हुने त्रिवि स्ववियु निर्वाचन अधिकृत डा.अमृत कुमार श्रेष्ठले जानकारी दिए ।
निर्वाचनमा प्रत्यक्षतर्फ १२ अध्यक्षसहित विभिन्न पदमा ६२ जना र ५० जना समानुपातिकतर्फको उम्मेद्वार रहेका छन् । त्रिवि स्ववियु निर्वाचनका अनुसार केन्द्रीय क्याम्पमा ३ हजार ४०२ जना मतदाता विद्यार्थी रहेका छन् ।
२१ सदस्यीय स्ववियु समितिमा प्रत्यक्ष निर्वाचन प्रणालीबाट एक जना अध्यक्ष, एक जना सचिव, एक जना कोषाध्यक्ष र ८ जना सदस्यहरु निर्वाचित हुनेछन् । यस्तै, समानुपातिक निर्वाचन प्रणालीबाट १० जना उम्मेदवार निर्वाचित हुनेछन् ।
