मकवानपुरको भूमि आयोग खारेज
मकवानपुर । मकवानपुरको भूमि समस्या समाधान आयोग खारेज भएको छ ।
शुक्रबार बसेको मन्त्रिपरिषद् बैठकले आयोग खारेज गर्दै आयोगको केन्द्र र जिल्लास्थित सम्पूर्ण संरचना बन्द गर्ने निर्णय गरेपछि मकवानपुरको पनि कार्यालय खारेजीमा परेको हो ।
सरकारको उक्त निर्णयसँगै केन्द्रका आयोगका पदाधिकारी र ७७ जिल्लाका आयोगका सदस्यहरु बर्खास्तगीमा परेका छन ।
केपी शर्मा ओली नेतृत्वको सरकारले केन्द्रमा नेकपा (एमाले) का नेता देवी ज्ञवालीको नेतृत्वमा भूमि समस्या समाधान आयोग गठन गरेको थियो । जिल्लामा एक अध्यक्ष सहित २ सदस्यलाई उपसचिव र अधिकत तहको सेवासुबिधा पाउने गरी नियक्त गरिएको थियो । तर, शेरबहादुर देउवा प्रधानमन्त्री भएसँगै आयोग खारेज भएको हो ।
राजनीतिक नियुक्ति भए पनि आयोगले भूमि सम्बन्धि धेरै काम अघि बढाइसकेको थियो । आयोगले देशभरका स्थानीय तहमार्फत् गरिएको प्रारम्भिक लगतअनुसार देशभर १४ लाख भूमिहीन परिवार रहेको निष्कर्ष निकालेको छ।
आयोग खारेज भएसँगै १४ लाख भूमिहीनले कहिले लालपुर्जा पाउँछन भन्ने विषयले चर्चा पाएको छ । सम्भवतः देउवा सरकारले अब छिट्टै नयाँ पदाधिकारीसहित भूमि समस्या समाधान आयोग पुनर्गठन गरी भूमिहीनका समस्या समाधान गर्ने विश्वास छ।