मकवानपुर उद्योग वाणिज्य संघका सचिव काब्यमणि अधिकारीको चामलको गोदाममा सिल

मकवानपुर, खाद्य प्रविधि तथा गुण नियन्त्रण कार्यालय सम्मिलित बजार अनुगमन टोलीले हेटौंडा उपमहानगरपालिका वडा नं. २ प्रभाकरपथमा रहेको मणि खाद्यन्न सेन्टरको एउटा वटा गोदाममा सिल गरेको छ ।

खाद्य प्रविधि तथा गुण नियन्त्रण कार्यालयका प्रमुख सोमकान्त रिजाल, जिल्ला प्रशासन कार्यालयका प्रशासकीय अधिकृत गुणराज प्रसाद न्यौपाने, उपभोक्ता हीत संरक्षण मञ्चका अध्यक्ष बासु खतिवडालगायतका टोलीले सो सेन्टरमा सिल लगाएको हो ।

हेर्नुहोस् समाचार

• हेटौंडाको मणि खाद्यान्न सेन्टरमा अनुगमन, २५ केजीको जगत चामलमा आधा केजीसम्म कम, उपभोक्तामाथि ठगी गरिएको पुष्टि

जगत ब्राण्डको २५ केजीको चामलको बोरा जोखेर हेर्दा सो बोरामा आधा किलोसम्म तौल कम भएको पाइएको थियो ।

अनुगमन टोलीले ६ वटा बोरामा नमूना तौल गरेको थियो । ६ वटै बोरामा आधा किलोसम्म तौल कम भेटिएको हो ।

तौल कम भेटिएपछि सो सेन्टरमा सिल गर्ने तयारी अनुगमन समितिको थियो । तर, प्रमुख जिल्ला अधिकारी दीपकराज नेपालले विक्री हुने पसलमा सिल लगाउन नदिएपछि एउटा मात्रै सटरमा सिल गरियो ।

मकवानपुर उद्योग बाणिज्य संघका सचिव समेत रहेका सो सेन्टरका संचालक काब्यमणि अधिकारीले मुसाले बोरा खाएपछि पुनः सिलाई गरिएको बयान टोलीलाई दिएका थिए ।

मकवानपुरका सीडीओ नेपालले नै सिल लगाउन रोकेपछि अनुगमन टोली निरीह भयो, तै पनि ५ वटा गोदाम मध्ये एउटा गोदाममा सिल गरियो, उपभोक्तकर्मी बासु खतिवडाले तु खबरलाई जानकारी दिए ।