अवैध सम्पत्ति आर्जन गरेको अभियोगमा इन्जिनियर दम्पती विरुद्ध मुद्दा दायर

अख्तियार दुरुपयोग अनुसन्धान आयोगले कलैया, बारास्थित खानेपानी तथा सरसफाई डिभिजन कार्यालयका तत्कालीन निमित्त कार्यालय प्रमुख एवं इन्जिनियर किशोरी प्रसाद यादव विरुद्ध भ्रष्टाचारको मुद्दा दायर गरेको छ ।

यादवले सार्वजनिक सेवाको पदमा रहँदा गैरकानुनी रूपमा सम्पत्ति आर्जन गरेको पुष्टि भएपछि आयोगले २०८३ वैशाख १० गते विशेष अदालत, काठमाडौंमा आरोपपत्र दायर गरेको हो ।

अनुसन्धानका क्रममा यादवको सेवा प्रवेश मिति २०४७ असार ३१ देखि २०८० पुस २९ सम्मको अवधिलाई जाँच अवधि कायम गरिएको थियो। यस अवधिमा उनको परिवारको वैध आय ३ करोड ४६ लाख २१ हजार ४०१ रुपैयाँ ९ पैसा देखिएको छ । यद्यपि, सोही अवधिमा उनले जग्गा खरिद, घर निर्माण, सेयर तथा सवारी साधन खरिद लगायतका शीर्षकमा ४ करोड ९३ लाख २ हजार ६२६ रुपैयाँ ९९ पैसा खर्च गरेको पाइएको छ। यसरी उनको कुल आय र व्ययको तुलना गर्दा १ करोड ४६ लाख ८१ हजार २२५ रुपैयाँ ९० पैसा बराबरको सम्पत्तिको स्रोत नखुलेको आयोगको निष्कर्ष छ।

अख्तियारले यादवमाथि भ्रष्टाचार निवारण ऐन बमोजिम कैद, बिगो बमोजिम जरिवाना र गैरकानुनी रूपमा आर्जन गरिएको सम्पत्ति जफत गर्न मागदाबी गरेको छ । साथै, उनले सम्पत्ति लुकाउनका लागि झुट्टा विवरण पेस गरेको समेत पुष्टि भएको आयोगको विज्ञप्तिमा उल्लेख छ ।

यस प्रकरणमा यादवकी श्रीमती निर्मला कुमारीलाई पनि प्रतिवादी बनाइएको छ । गैरकानुनी रूपमा आर्जन गरिएको सम्पत्ति श्रीमतीको नाममा समेत राखेको र प्रयोग गरेको देखिएकाले सो सम्पत्ति जफत गर्ने प्रयोजनका लागि उनलाई प्रतिवादी कायम गरिएको प्रवक्ता सुरेश न्यौपानेले जानकारी दिनुभएको छ ।