दिल्लीमा प्रदूषण र बाक्लो कुहिरोको दोहोरो मार, उडान तालिका प्रभावित

काठमाडौँ । वायु प्रदूषणबाट कुनै राहत नदेखिएसँगै भारतको राष्ट्रिय राजधानी दिल्ली शुक्रबार फेरि बाक्लो कुहिरो, कम दृश्यता र अत्यन्तै खराब वायु गुणस्तरसँग ब्यूँझिएको छ। शहरको समग्र वायु गुणस्तर सूचकांक३८७ मापन भई ‘धेरै खराब स्तरमा रहेको छ भने बिहानको समयमा धेरै स्थानमा ४०० नाघेर गम्भीर तहमा पुगेको देखिएको छ।

बाक्लो कुहिरो र न्यून दृश्यताका कारण हवाई उडानहरू प्रभावित हुने सम्भावनालाई मध्यनजर गर्दै एयर इन्डिया, इन्डिगो र स्पाइसजेट जस्ता प्रमुख एयरलाइन्सहरूले यात्रुहरूका लागि यात्रा सल्लाह जारी गरेका छन्। एयरलाइन्सहरूले यात्रुहरूलाई विमानस्थल जानु अघि आफ्नो उडानको अवस्था अनिवार्य रूपमा जाँच गर्न र यात्राका लागि अतिरिक्त समय छुट्याउन आग्रह गरेका छन्।

इन्डिगोले सामाजिक सञ्जालमार्फत जारी गरेको सूचनामा कम दृश्यताका कारण सडक ट्राफिक सुस्त हुन सक्ने उल्लेख गर्दै यात्रुहरूलाई सतर्क रहन सुझाव दिएको छ। दिल्ली विमानस्थल प्रशासनले पनि बाक्लो कुहिरोका कारण हाल सीएटी  प्रणालीअन्तर्गत सञ्चालन भइरहेको जानकारी दिँदै केही उडानहरू प्रभावित भएको पुष्टि गरेको छ। अधिकारीहरूका अनुसार यात्रुहरूलाई सहयोग गर्न आवश्यक व्यवस्था मिलाइएको छ।

यसअघि कम दृश्यताकै कारण एकै दिन २७ उडान रद्द भएपछि शुक्रबारको अवस्था थप चुनौतीपूर्ण बनेको हो। स्पाइसजेटले पनि आफ्ना यात्रुहरूलाई उडानको स्थिति नियमित रूपमा जाँच गर्न आग्रह गरेको छ। एयर इन्डियाले भने फोगकेयर पहलअन्तर्गत यात्रुहरूलाई दर्ता गरिएको मोबाइल नम्बरमा अग्रिम सूचना उपलब्ध गराउने र कुनै अतिरिक्त शुल्क नलिई उडान परिवर्तन गर्न सकिने सुविधा रहेको जानकारी गराएको छ।

शहरभरि बाक्लो कुहिरोले ढाकिएका दृश्यहरू देखिएका छन् भने सडकमा सवारी साधनहरू बत्ती बालेर बिस्तारै गुडिरहेका छन्। दिल्ली विमानस्थलमा पनि लगभग शून्य दृश्यताको बीच यात्रुहरू आगमन र प्रस्थान गरिरहेका दृश्य देखिएको छ।

केन्द्रीय प्रदूषण नियन्त्रण बोर्ड का अनुसार शुक्रबार बिहान ८ बजेसम्म दिल्लीका विभिन्न क्षेत्रहरू अत्यधिक प्रदूषित अवस्थामा छन्, जहाँ एक्युआइ गम्भीर तहमा पुगेको छ। लगातार बिग्रँदो मौसम र प्रदूषणले जनजीवन, यातायात तथा हवाई सेवामा ठूलो असर पारिरहेको छ।