भारतको लद्दाखमा राज्यको मागसहितको प्रदर्शन हिंसात्मक

लेह, लद्दाखमा बुधबार राज्यको माग र संविधानको छैठौं अनुसूचीमा समावेशीकरणका लागि गरिएको विशाल प्रदर्शन हिंसात्मक बनेको छ। लेह सर्वोच्च निकाय र कारगिल लोकतान्त्रिक गठबन्धन को आह्वानमा भएको विरोधमा केही प्रदर्शनकारीले ढुंगा प्रहार र आगजनी गरेपछि प्रहरीले अश्रुग्यास र लाठीचार्ज गर्न बाध्य भएको थियो।

एएनआईका अनुसार, प्रदर्शनकारीहरूले भारतीय जनता पार्टी (भाजपा) को लेहस्थित कार्यालयमा आगजनी गरेका थिए भने हिल काउन्सिल परिसरमा पनि ढुङ्गा प्रहार भएको थियो। यसअघि, हजारौँ प्रदर्शनकारी एनडीएस स्मारक मैदानमा भेला भएर छैठौं अनुसूची र राज्य पुनर्स्थापनाको मागसहित नारा लगाउँदै सडकमा उतरेका थिए।

लेह जिल्ला प्रशासनले पाँच वा बढी व्यक्तिको भेला प्रतिबन्ध गर्ने आदेश जारी गर्दै पूर्व स्वीकृति बिना कुनै र्‍याली वा जुलुस नगर्न चेतावनी दिएको छ। जिल्ला मजिस्ट्रेट रोमिल सिंह डोंकले सार्वजनिक शान्ति भंग हुने गतिविधि नगर्न आग्रह गरेका छन्।

यसैबीच, जलवायु कार्यकर्ता सोनम वाङ्चुकले लेहमा भइरहेको झडपबीच आफ्नो १५ दिने अनशन समाप्त गर्दै शान्तिको अपील गरेका छन्। उनका अनुसार, “समर्थकहरूलाई थप समस्यामा पार्न नचाहेको” कारण उनले अनशन तोडेका हुन्।

गृह मन्त्रालय, एलएबी  र केडीए बीचको अर्को वार्ता अक्टोबर ६ का लागि तय गरिएको छ। यी दुवै निकायले विगत चार वर्षदेखि संयुक्त रूपमा लद्दाखलाई राज्यको दर्जा र छैठौं अनुसूचीको संरक्षण दिलाउन आन्दोलन चलाई आएका छन्।

विरोधप्रति प्रतिक्रिया दिँदै जम्मु–कश्मीरका पूर्वमुख्यमन्त्री ओमर अब्दुल्लाले भने, “लद्दाखलाई राज्यको वाचा गरिएको थिएन, उनीहरूले 2019 मा केन्द्रशासित प्रदेश स्थिति मनाएका थिए। अहिले उनीहरू धोका र असन्तुष्ट महसुस गरिरहेका छन्। यो अवस्थाबाट जे एण्ड के  को निराशा अझ गहिरो हुने गर्छ।”