थाइल्याण्डका पूर्व प्रधानमन्त्री थाक्सिन शाही अपमान मुद्दामा निर्दोष

बैंककस्थित अदालतले थाइल्याण्डका पूर्व प्रधानमन्त्री तथा अर्बपति थाक्सिन सिनावात्रालाई शाही अपमान मुद्दामा निर्दोष ठहर गरेको छ।

दश वर्षअघि दक्षिण कोरियाली पत्रिकासँगको अन्तर्वार्तामा उनले प्रिभि काउन्सिल र दरबारसँग सम्बन्धित केही व्यक्तिहरूको आलोचना गरेको आरोपमा उनीविरुद्ध मुद्दा दायर गरिएको थियो।बीबिसी समाचारका अनुसार दोषी प्रमाणित भएमा उनलाई १५ वर्ष जेल सजाय हुन सक्थ्यो।

अदालतले थाक्सिनले प्रत्यक्ष रूपमा राजा, रानी वा उत्तराधिकारीको नाम नलिए पनि उनको टिप्पणीलाई राजनीतिक व्याख्या गरिएको भन्दै सफाइ दिएको हो।

यससँगै थाक्सिन र उनका परिवारले राहतको सास फेरेका छन्। उनका वकिल विन्याट चारमोन्ट्रीका अनुसार फैसला सुनेपछि थाक्सिनले देशको हितमा काम गर्ने प्रतिबद्धता जनाए।

थाइल्याण्डको लेस मेजेस्टे कानूनले राजतन्त्रको आलोचना वा अपमानलाई अपराध माने पनि पछिल्ला वर्षहरूमा यसलाई कार्यकर्ता र राजनीतिक विरोधीलाई दबाउन प्रयोग गरिएको आरोप लाग्दै आएको छ।

यसबीच, निलम्बित प्रधानमन्त्री तथा थाक्सिनकी छोरी प्यातोङटार्नविरुद्ध संवैधानिक अदालतमा विचाराधीन मुद्दाले शिनावात्रा परिवारको राजनीतिक भविष्य अझै अनिश्चित बनाइरहेको छ।