मकवानपुरमा थप ७ जनामा डेंगु पुष्टि, कुल संख्या ६७५ पुग्यो
तु खबर संवाददाता
मकवानपुर । मकवानपुरमा पछिल्लो २४ घण्टामा थप ७ जनामा डेंगु संक्रमण पुष्टि भएको छ । सो अवधिमा गरिएको परीक्षणमा उनीहरुमा डेंगु संक्रमण पुष्टि भएको जिल्ला स्वास्थ्य कार्यालय मकवानपुरले जनाएको छ ।
जिल्ला स्वास्थ्य कार्यालयका अनुसार, सो अवधिमा हेटौंडा उपमहानगरपालिकाका ६ जना र बकैया गाउँपालिकाका एक जनामा गरी ७ जनामा डेंगु संक्रमण पुष्टि भएको हो ।
यससँगै जिल्लामा डेंगु संक्रमितको कुल संख्या ६७५ पुगेको छ । उक्त तथ्याङ्क गत साउन १ गतेदेखि आजसम्मको हो ।
जिल्लामा हालसम्म संक्रमित भएकामध्ये सबैभन्दा धेरै संक्रमित हेटौंडा उपमहानगरपालिमा रहेका छन् । त्यहाँ ४५८ जनामा डेंगू संक्रमण पुष्टि भएको छ ।
यसैगरी, थाहानगरपालिकाका ३ जना, मकवानपुरगढी गाउँपालिकाका १८ जना, बागमती गाउँपालिकाका २४ जना, मनहरी गाउँपालिकाका ६४ जना, इन्द्रसरोवर गाउँपालिकाका ४ जना, भीमफेदी गाउँपालिकाका ३४ जना, बकैया गाउँपालिकाका २० जना र राक्सिराङ गाउँपालिकामा २ जनामा डेंगू संक्रमण पुष्टि भएको छ ।
सो अवधिमा जिल्लाको कैलाश गाउँपालिकामा भने एक जनामा पनि डेंगुु संक्रमित बिरामी फेला नपरेको जिल्ला स्वास्थ्य कार्यालयले जनाएको छ ।
यस्तै, सो अवधिमा हेटौंडामा अस्पतालमा ४० जना र अन्य जिल्लाका ७ जनामा संक्रमण पुष्टि भएको छ ।
त्यस्तै, सो अवधिमा जिल्लामा डेंगू संक्रमणका कारण एक जनाको मृत्यु भएको छ ।