इन्द्रसरोवरमा ईभी गाडी दुर्घटना, चार जनाको घटनास्थलमै मृत्यु

हेटौंडाबाट काठमाडौंका लागि छुटेको विद्युतीय सवारीसाधन (ईभी) मकवानपुरको इन्द्रसरोवर गाउँपालिका–२ स्थित सल्ले सुकौरामा दुर्घटना हुँदा चार जनाको मृत्यु भएको छ।

इलाका प्रहरी कार्यालय भीमफेदीका अनुसार मंगलबार दिउँसो करिब २ बजे दुर्घटना भएको हो। यात्रुसहित आठ जना सवार रहेको उक्त गाडी सडकबाट करिब ५०० मिटर तल भिरमा खसेको प्रहरीले जनाएको छ।

दुर्घटनामा चार जनाको घटनास्थलमै मृत्यु भएको छ भने अन्य चार जनालाई उद्धार गरिएको छ। उद्धार गरिएकामध्ये एक जनालाई उपचारका लागि हेटौंडा अस्पताल पठाइएको र बाँकी घाइतेलाई काठमाडौं लगिएको प्रहरीको भनाइ छ।

दुर्घटनामा ज्यान गुमाउने तथा घाइते हुनेहरूको पहिचान भने अहिलेसम्म सार्वजनिक गरिएको छैन। दुर्घटनाको कारणबारे थप अनुसन्धान भइरहेको प्रहरीले जनाएको छ।