चन्द्रकुवेर खापुङ नेपाल प्रहरीको ३२औं महानिरीक्षक नियुक्त
तु खबर संवाददाता
काठमाडौं । नेपाल सरकारले चन्द्रकुवेर खापुङलाई नेपाल प्रहरीको ३२औं प्रहरी महानिरीक्षक (आईजीपी) नियुक्त गर्ने निर्णय गरेको छ । शुक्रबार बसेको मन्त्रिपरिषद् बैठकले खापुङलाई भदौ १९ गतेदेखि लागू हुने गरी प्रहरी महानिरीक्षक पदमा नियुक्त गर्ने निर्णय गरेको हो ।
हालका आईजीपी दिपक थापा भदौ १८ गते राति १२ बजेदेखि अवकाश पाउँदैछन् । प्रधानमन्त्री केपी शर्मा ओली शनिबारदेखि चीन भ्रमणमा जाने भएकाले त्यसअघि बसेको मन्त्रिपरिषद्ले प्रहरी नेतृत्वमा खापुङको नाम टुंगो लगाएको हो ।
खापुङ हाल प्रहरीको केन्द्रीय अनुसन्धान ब्यूरो (सीआईबी) का प्रमुख छन् । उनी अहिलेसम्म विवादमा नपरेका प्रहरी अधिकृत मानिन्छन् । प्रहरी उपरीक्षक (एसपी) हुँदा हेडक्वार्टरको कर्मचारी प्रशासन शाखामा काम गरेका खापुङले एसएसपी हुँदा उपत्यका अपराध अनुसन्धान कार्यालयको कमाण्ड गरेका थिए । डीआईजीका रूपमा उनले कोशी प्रदेश कमाण्ड सम्हालेका थिए ।
यसै वर्ष वैशाख १६ मा एआईजीमा बढुवा भएका खापुङ ६ जना एआईजीमध्ये मेरिट लिस्टमा पहिलो नम्बरमा रहेका थिए । उनी अहिलेका आईजीपी थापासँगै इन्स्पेक्टर भर्नाका लागि आवेदन फाराम भरेका थिए । थापाको अवकाशसँगै खापुङ नेपाल प्रहरीको ३२औं महानिरीक्षकको जिम्मेवारी सम्हाल्ने भएका छन् ।
