नेपाल गोरखा परिवार दक्षिण कोरियाको अधिवेशन आइतबार हुँदै

दक्षिण कोरिया । नेपाल गोरखा परिवार दक्षिण कोरियाको तेह्रौं अधिवेशन हुँदैछ । आउँदो आइतबार अर्थात् १७ अगष्ट २०२५ मा अधिवेशन हुने जनाइएको छ । प्रवासी भुमिमा हाम्रो एकता, हरेक सुख दुःखमा साथ दिने हाम्रो प्रतिवद्धता भन्ने नाराका साथ कोरियामा सक्रिय संस्थाको रुपमा परिचित गोरखा परिवार दक्षिण कोरियाले आफ्नो अधिवेशन सुवनस्थित भेटघाट रेष्टुरेण्टमा आयोजना गर्न लागेको हो ।

संस्थाका अध्यक्ष दीपक श्रेष्ठका अनुसार, बाह्रौं कार्यसमितिको कार्यकाल पूरा भइसकेकोले अधिवेशनबाट नयाँ कार्यसमितिसमेत चयन गरिनेछ ।

अधिवेशनलाई सफल बनाउनका लागि तयारी तीब्र पारिएको संस्थाका महासचिव अशोक खड्काले जानकारी दिए । हामीले तीब्रताका साथ तयारी गरिरहेका छौँ, संस्थाका सल्लाहकार, बुद्धिजीवी, शुभचिन्तक र सम्पूर्ण सदस्यहरूलाई उपस्थितिका लागि अनुरोध गरिसकिएको छ । कार्यक्रमको व्यवस्थापकीय पाटोमा पनि काम गरिरहेका छौँ, उनले भने । कार्यक्रम दिउँसो १२ बजेबाट सुरु हुने समेत उनले बताए ।

सन् २००२ मा स्थापित यस संस्था गोरखा जिल्लाबाट प्रतिनिधित्व गर्दै विभिन्न पेशा, व्यवसाय तथा रोजगारीका लागि कोरियामा रहेकाहरूलाई एकतावद्ध गर्दै सामाजिक तथा परोपकारी क्रियाकलापहरुमा सक्रिय छ ।