दक्षिण कोरियाका पूर्व राष्ट्रपति युनकी पत्नी भ्रष्टाचार आरोपमा पक्राउ

दक्षिण कोरियाका पदच्युत पूर्व राष्ट्रपति युन सुक येओलकी पत्नी किम केओन हे घुसखोरी, स्टक मूल्य हेरफेर, उम्मेदवार छनोटमा हस्तक्षेप लगायतका विभिन्न भ्रष्टाचार आरोपमा मंगलबार पक्राउ परेकी छन्। सियोल केन्द्रीय जिल्ला अदालतले प्रमाण नष्ट गर्ने जोखिम रहेको ठहर गर्दै विशेष अभियोजकको गिरफ्तारी वारेन्टको अनुरोध स्वीकार गरेको हो।

किममाथि २०२२ को विधायिका उपचुनावमा कन्जरभेटिभ पीपुल पावर पार्टीको उम्मेदवार मनोनयनमा अनुचित प्रभाव पारेको, चुनाव डाटा हेरफेर गर्न सहयोग गरेको, युनिफिकेशन चर्चसँग जोडिएको व्यक्तिबाट महँगा उपहार लिएको र स्थानीय बी एम डब्लु डिलरशिपसँग सम्बन्धित स्टक हेरफेर योजनामा संलग्न भएको आरोप छ।

उनी हाल दक्षिण सियोलको डिटेन्सन सेन्टरमा राखिएकी छन् र बिहीबार थप सोधपुछ हुने अपेक्षा गरिएको छ। अनुसन्धान टोलीले हालै उनका निकट सहयोगी र एक निर्माण कम्पनीका अध्यक्षलाई पनि पक्राउ गरेको छ, जसले किमका लागि ४३ हजार डलर मूल्यको लक्जरी नेकलेस खरिद गरेको आरोप छ।

यो घटना युन र किम दुवै एकैपटक आपराधिक अभियोगमा जेल परेका दक्षिण कोरियाको पहिलो पूर्व राष्ट्रपति दम्पती बन्नेगरी आएको हो। युन सुक येओल गत वर्षको मार्शल ल घोषणा प्रकरणपछि महाभियोगमार्फत पदच्युत भएका थिए र हाल विद्रोह लगायत गम्भीर आरोपमा मुद्दा खेपिरहेका छन्।