हेटौंडाबाट लागूऔषधसहित भारतीय नागरिक पक्राउ

मकवानपुर । प्रहरीले पूर्व–पश्चिम सडकखण्ड अन्तरगत पर्ने मकवानपुरको हेटौंडा उपमहानगरपालिका वडा नम्वर १५, रातोमाटेबाट लागूऔषधसहित आज बिहान एक भारतीय नागरिकलाई पक्राउ गरेको छ ।

पक्राउ पर्नेमा देश भारत बेतिया जिल्ला थाना मझौलिया बस्ने बर्ष ३० को मुसादेव आलम रहेका छन् । उनलाई १८ किलो ५०० ग्राम लागूऔषध गाँजासहित गरेको जिल्ला प्रहरी कार्यालय मकवानपुरले जनाएको छ ।

प्रहरीका अनुसार, बिहान १० बजेको समयमा हेटौंडाबाट पथलैयातर्फ जाँदै गरेको बीआर ०५ पीबी ७३६४ नम्वरको अटोलाई रोकी चेकजाँच गरेको थियो ।

सो क्रममा उक्त अटो खानतलासी गर्दा अटोको पछाडीको सिट मुनी लुकाईछिपाई ल्याइएको सो परिमाणको गाँजा बरामद भएपछि अटो चालक आलमलाई पक्राउ गरिएको हो ।

पक्राउ परेका उनलाई मकवानपुर जिल्ला अदालतबाट ७ दिनको म्याद थप गरी कानूनी प्रकृया अगाडि बढाइएको छ ।