गोली प्रहार गरेर लागूऔषध कारोबारी पक्राउ

काठमाडौं । मोरङको रतुवामाई नगरपालिका–६ मा प्रहरीले गोली प्रहार गरेर एक जना लागूऔषध कारोबारीलाई पक्राउ गरेको छ ।

पक्राउ पर्नेम भारतको बिहार घर भएका ४८ वर्षीय भागिरथ हरिजन रहेका छन् । उनलाई लागूऔषध नियन्त्रण ब्युरोबाट खटिएको प्रहरीले पक्राउ गरेको हो ।

प्रहरीले चलाएको गोली लागेर उनी घाइते भएका छन् । उनको दायाँ खुट्टामा गोली लागेको जिल्ला प्रहरी कार्यालय मोरङका एक जना अधिकृतले जानकारी दिए ।

लागूऔषध नियन्त्रण ब्युरोका प्रहरी नायव निरीक्षक बालकृष्ण सन्जेल नेतृत्वको टिमले गोली चलाएको हो ।

उनलाई नियन्त्रणमा लिने क्रममा ब्युरोबाट खटिएका असई नवीन शाही पनि घाइते भएका छन् ।

उक्त घटनाको बारेमा प्रहरीले आवश्यक अनुसन्धान गरिरहेको छ ।