भोलिबाट हेटौंंडा कप एसियाली खुल्ला बुद्धिचाल हुँदै, सबै तयारी पूरा

मकवानपुर । मकवानपुरको हेटौंडामा भोलि मंसिर १२ गते बुधबारदेखि अन्तर्राष्ट्रिय एसियाली बुद्धिचाल प्रतियोगिता हुने भएको छ ।

प्रतियोगिता मकवानपुर जिल्ला बुद्धिचाल संघको आयोजनामा हुने भएको हो । उक्त प्रतियोगिताको सबै तयारी पूरा भइसकेको मंगलबार हेटौंडामा पत्रकारसम्मलेनमार्फत जानकारी गराएको हो ।

सम्मेलनमा प्रतियोगिताका संयोजक एवम् संघका केन्द्रीय महासचिव धरम लामाले प्रतियोगितामा सहभागी हुने खेलाडीहरु मंगलबार साँझसम्ममा हेटौंडा आइपुग्ने र बुुधबार बिहानबाट प्रतियोगिता सुरु हुने जानकारी गराए ।

सो प्रतियोगितामा १ सय २० जना खेलाडी सहभागी गराउने लक्ष्य रहेकोमा मंगलबार बिहानसम्ममा १ सय १ जना खेलाडीले सहभागिताका लागि नाम दर्ता गरिसकेको उनको भनाई छ ।

मंसिर १७ गतेसम्म संचालन हुने प्रतियोगिता स्विस लिग प्रणालीमा खेलाइने बुद्धिचाल संघ मकवानपुरका अध्यक्ष मनोज श्रेष्ठले जानकारी दिए ।

सो प्रतियोगितामा प्रथम, द्वितीय, तृतीय, चौथो, पाँचौं र छैटौंदेखि दशौंसम्म हुनेले क्रमशः १ लाख २५ हजार रुपैयाँ, ७५ हजार रुपैयाँ, ४० हजार रुपैयाँ, २५ हजार रुपैयाँ, २० हजार रुपैयाँ, १५ हजार रुपैयाँ र ११ हजार रुपैयाँसहित प्रमाणपत्र प्राप्त गर्नेछन् ।