निमावि तहको गणित, विज्ञानमा ५७ जनामात्रै पास

तु खबर संवाददाता
२०७९ मंसिर ११,आईतवार १५:३२

काठमाडौं । शिक्षक सेवा आयोगले निम्न माध्यमिक तहको गणित, विज्ञान विषयमा ५७ जनाले मात्र लिखित परीक्षा उतीर्ण गरेका छन् । सबै प्रदेशमा गरी ३८१ जना शिक्षक माग गरेकामा ५७ जनाले मात्रै लिखित परीक्षा उतीर्ण गरेको शिक्षक सेवा आयोगले जनाएको छ ।

आयोगका अनुसार, गत चैत १७ गते भएको सामान्य लिखित परीक्षा र असार ११ गतेको विषयगत लिखित परीक्षा उतीर्ण हुने जम्मा ५७ जना मात्र भएका छन् । अब यी ५७ जनाले अन्तर्वार्ता परीक्षा दिनुपर्नेछ, सबै परीक्षार्थी अन्तर्वार्तामा उतीर्ण हुँदा पनि ३२४ दरबन्दी रिक्त नै रहने भएको छ ।

मधेश प्रदेशमा निमाविको गणित विज्ञानका लागि २० शिक्षक माग गरिएकोमा एक जनाले पनि लिखित परीक्षामा उतीर्ण हुन नसकेको जनाइएको छ । यसैगरी, प्रदेश १ मा १६१ रिक्त पदको लागि २४, बागमती प्रदेशमा ५८ रिक्त पदको लागि जम्मा २ जना, गण्डकी प्रदेशमा ३९ रिक्त पदको लागि जम्मा पाँच जना उत्तीर्ण भएका छन् ।

त्यस्तै, लुम्बिनी प्रदेशमा ३३ रिक्त पदको लागि ५ जना, कर्णाली प्रदेशमा २३ रिक्त पदको लागि ७ जना र सुदूरपश्चिम प्रदेशमा ४७ रिक्त पदको लागि १४ जना उतीर्ण भएका छन् । उत्तीर्ण शिक्षकहरुको अन्तरवार्ता मंसिर २८ गतेको लागि तोकिएको छ ।