नेपालमा असोज दोस्रो हप्तादेखि कोरोनाको तेस्रो लहर आउन सक्ने

तु खबर संवाददाता
२०७८ श्रावण ११,सोमबार १५:४१

काठमाडौं । स्वास्थ्य तथा जनसंख्या मन्त्रालयले नेपालमा कोरोना संक्रमणको तेस्रो लहर आगामी असोज दोस्रो हप्तादेखि आउन सक्ने जनाएको छ ।

मन्त्रालयले संसदको शिक्षा तथा स्वास्थ्य समितिमा सोमबार कोभिड–१९ रोकथाम तथा नियन्त्रणका लागि नेपाल सरकारले गरेका प्रयासहरूको संक्षिप्त विवरण तथा आगामी कार्यदिशा प्रस्तुत गर्दै नेपालमा कोरोना संक्रमणको तेस्रो लहर आगामी असोज १५ देखि आउन सक्ने जनाएको हो ।

सो बैठकमा मन्त्रालयका सहसचिव गंगा लोहनीले मंसिरमा पुनः संक्रमण बढ्न सक्ने सम्भावनालाई आँकलन गरिएको जानकारी दिए ।

यद्यपि भेरियन्टको स्वरुप र प्रकृति, खोपको उपलब्धता र प्रयोग, सामाजिक गतिविधि तथा जनस्वास्थ्यका आधारभूत मापदण्डहरूको पालनाको स्तरले यसलाई अगाडि वा पछाडि धकेल्नसक्ने उनले बताए ।