७४ लाख घुस प्रकरणमा नेपाल बैंकका तत्कालीन अध्यक्ष अधिकारी दोषी ठहर
तु खबर संवाददाता
कर्जा प्रवाहका क्रममा व्यवसायीहरूसँग ७४ लाख रुपैयाँ घुस लिएको अभियोग लागेका नेपाल बैंक लिमिटेड सञ्चालक समितिका तत्कालीन अध्यक्ष डा. चन्द्रबहादुर अधिकारी दोषी ठहर भएका छन् ।
विशेष अदालतले सोमबार अधिकारीलाई भ्रष्टाचार मुद्दामा दोषी ठहर गरेको हो ।
विशेष अदालतका न्यायाधीशहरू नारायणप्रसाद पौडेल, डिल्लीरत्न श्रेष्ठ र विदुर कोइरालाको इजलासले अधिकारीसँग सम्बन्धित मुद्दामा फैसला गरेको हो ।
कर्जा प्रवाहका क्रममा तीन व्यवसायीसँग घुस लिएको आरोपमा अख्तियार दुरुपयोग अनुसन्धान आयोगले २०८२ जेठमा अधिकारीसहितविरुद्ध भ्रष्टाचार मुद्दा दायर गरेको थियो । अधिकारीसँग सम्बन्धित ६ वटा छुट्टाछुट्टै मुद्दा दायर भएका थिए ।
विशेष अदालतका अनुसार ती ६ मुद्दामध्ये दुईवटामा अधिकारी दोषी ठहर भएका छन् भने दुईवटामा आंशिक ठहर भएको छ । बाँकी दुईवटा मुद्दामा भने उनलाई सफाइ दिइएको छ ।
यसै प्रकरणमा प्रतिवादी बनाइएका सुमित्राकुमारी घिमिरे र ईश्वरीप्रसाद गौतमले भने सफाइ पाएका छन् ।