साउनको अन्तिम सोमबार पशुपतिनाथमा भक्तजनको घुइँचो

काठमाडौँ। साउन महिनाको अन्तिम सोमबार आज बिहानैदेखि पशुपतिनाथ मन्दिरमा पूजा-आराधना तथा दर्शनका लागि श्रद्धालु भक्तजनको घुइँचो लागेको छ। बिहानैदेखि वर्षा भइरहे पनि शिवभक्तहरू लामबद्ध भएर पशुपतिनाथको दर्शन तथा पूजाआराधनाका लागि पुगेका छन्।

भक्तजनको सहजताका लागि पशुपतिनाथ मन्दिरका चारै ढोका बिहान ३ बजेदेखि नै खुला गरिएको पशुपति क्षेत्र विकास कोष सञ्चालक परिषद्का सदस्य केदारमान भण्डारीले जानकारी दिए।

पशुपतिनाथ प्रवेशका लागि गौशाला, जयवागीश्वरी, मित्र उद्यान, चाबहिल, मैजुबहाल, चुच्चेपाटी, कुमारीगाल, वाग्मती करिडोर, गुह्येश्वरी, मृगस्थली, गौरीनगर र पिङ्गलास्थान आसपासबाट भक्तजन आउने क्रम जारी छ। गौरीनगर क्षेत्रसम्मै दर्शनार्थीको लाम पुगेको छ।

साउन महिनाका प्रत्येक सोमबार व्रत बसेर भगवान् शिवको पूजा गर्ने महिलासहितका भक्तजनले आज विधिपूर्वक व्रत समापन गर्ने धार्मिक परम्परा छ। साउनका अन्य सोमबार व्रत बस्न वा पूजाआजा गर्न नसके पनि अन्तिम सोमबार व्रत बसेर शिवको पूजा गरे मनोकांक्षा पूरा हुने धार्मिक विश्वास रहिआएको छ।

साउनको सोमबार भगवान् शिवको प्रिय दिनका रूपमा लिइने भएकाले यस दिन भक्तजनले व्रत, पूजापाठ, दान तथा धार्मिक गतिविधि गर्ने गर्छन्। अन्तिम सोमबार विशेष धार्मिक महत्वका कारण अन्य सोमबारको तुलनामा बढी भक्तजन शिवालयमा पुग्ने गरेका छन्।

यस अवसरमा सुन्दरीजलबाट वाग्मतीको जल ल्याएर पशुपतिनाथमा चढाउने बोलबम तीर्थालुको पनि उल्लेख्य सहभागिता छ। बोलबम यात्राका लागि सुन्दरीजलमा जम्मा भएका श्रद्धालुहरू वाग्मतीको जल बोकेर पशुपतिनाथ पुगेका छन्। उनीहरूका लागि जल चढाउने विशेष व्यवस्था मिलाइएको छ।

पशुपति क्षेत्रमा दर्शनार्थीको सहज, सुरक्षित र व्यवस्थित दर्शन तथा विशेष पूजाका लागि सुरक्षा व्यवस्था, स्वयंसेवक परिचालन, दर्शन व्यवस्थापन, स्वास्थ्य शिविर र खानेपानीलगायतका प्रबन्ध गरिएको छ।

साउनको अन्तिम सोमबार पशुपतिनाथसँगै देशभरका विभिन्न शिवालयमा पनि बिहानैदेखि भक्तजनको घुइँचो लागेको छ। काठमाडौँको पशुपतिनाथ, भक्तपुरको डोलेश्वर, ललितपुरको कुम्भेश्वर, खोटाङको हलेसी, सुनसरीको पिण्डेश्वर, म्याग्दीको गलेश्वर, कपिलवस्तुको कुशेश्वर, पर्वतको गुप्तेश्वर, जनकपुरको कपिलेश्वर, जलेश्वरका सिरेश्वर तथा कलानेश्वर र दाङको धारपानीलगायतका शिवालयमा भक्तजन पुगेका छन्।

चितवन, नवलपरासी र तनहुँको संगमस्थल देवघाटधाममा पनि साउनको अन्तिम सोमबार पूजा–आराधना तथा बोलबम मेला भर्न भक्तजनको भीड लागेको छ।