रास्वपा नेता पाँडेविरुद्ध विद्युतीय कारोबार ऐनअन्तर्गत मुद्दा दर्ता

काठमाडौं। राष्ट्रिय स्वतन्त्र पार्टी (रास्वपा) का केन्द्रीय सदस्य तथा राष्ट्रिय योजना आयोगका पूर्वसदस्य अरनिको पाँडेविरुद्ध विद्युतीय कारोबार ऐनअन्तर्गत मुद्दा दर्ता भएको छ।

जिल्ला सरकारी वकिल कार्यालयले काठमाडौं प्रहरीले बुझाएको अनुसन्धान प्रतिवेदनका आधारमा जिल्ला अदालतमा मुद्दा दर्ता गरेको हो।

पाँडेविरुद्ध एक महिलाले ईमेल र ह्वाट्सएपमार्फत अश्लील म्यासेज पठाई गालीगलौज गरेको, मानसिक यातना दिएको र अपमान गरेको आरोप लगाउँदै साइबर ब्युरोमा उजुरी दिएकी थिइन्।

सोही उजुरीका आधारमा जिल्ला अदालत काठमाडौंले बिहीबार अनुसन्धानका लागि पाँडेविरुद्ध चार दिनको म्याद दिएको छ। हाल उनलाई प्रहरी वृत्त दरबारमार्गमा राखिएको छ।

पाँडे अन्तर्राष्ट्रिय एकीकृत पर्वतीय विकास केन्द्रका कर्मचारी तथा शिक्षा विज्ञसमेत हुन्।