पालिकामा निमित्त प्रमुख प्रशासकीय अधिकृतको व्यवस्था अन्त्य : मन्त्री न्यौपाने

काठमाण्डौ – सङ्घीय मामिला तथा सामान्य प्रशासनमन्त्री भगवती न्यौपानेले अब कुनै पनि पालिकामा निमित्त प्रमुख प्रशासकीय अधिकृत नरहने घोषणा गर्नुभएको छ।

सुशासन कायम गर्न कर्मचारी प्रशासनलाई मुख्य औजारका रूपमा लिने बताउँदै उहाँले यसलाई निरन्तर सुधार र परिमार्जन गर्ने कार्यमा आफू जुटिरहेको उल्लेख गर्नुभयो। मन्त्री पद सम्हाल्ने बेलामा सबै पालिकामा प्रमुख प्रशासकीय अधिकृत खटाउने घोषणा कार्यान्वयन भएको उहाँको भनाइ छ।

यसअघि देशभरका करिब दुई सय पालिका निमित्त प्रमुख प्रशासकीय अधिकृतको भरमा सञ्चालन भइरहेका थिए। अहिले ती सबै पालिकामा स्थायी रूपमा प्रमुख प्रशासकीय अधिकृत खटाइएको छ।

स्थानीय तह पुनर्संरचनापछि पहिलोपटक देशभरका नगरपालिका र गाउँपालिकामा निमित्त प्रमुख प्रशासकीय अधिकृतको संख्या शून्यमा झरेको हो। यसक्रममा दुई वर्षभन्दा बढी मन्त्रालय वा अन्तर्गत कार्यालयमा कार्यरत, उपत्यकामा सीमित, स्थानीय तहमा काम नगरेका, प्रदेशतर्फ खटिएका तथा फाजिल समूहका कर्मचारीलाई प्राथमिकतामा राखेर सरुवा गरिएको मन्त्रालयले जनाएको छ।

संघीय मामिला तथा सामान्य प्रशासन मन्त्रालयले बिहीबार मात्र १२२ जना उपसचिव र ९७ जना शाखा अधिकृतको सरुवा गर्दै अधिकांशलाई नगर तथा गाउँपालिकाको प्रमुख प्रशासकीय अधिकृतका रूपमा खटाएको छ।

मन्त्री न्यौपानेका अनुसार, सहसचिव प्रमुख प्रशासकीय अधिकृत हुने ९ उपमहानगरपालिका र १ महानगरपालिकामा समेत छिट्टै दरबन्दीअनुसारको प्रमुख प्रशासकीय अधिकृत पठाउने तयारी भइरहेको छ।

उहाँले आम जनताको हितलाई ध्यानमा राखेर पालिकामा निमित्त प्रमुख प्रशासकीय अधिकृतको प्रवृत्ति अन्त्य गरिएको स्पष्ट पार्नुभएको छ।