मनसुन सक्रिय, देशभर मध्यम वर्षा, केही ठाउँमा ठूलो पानीको सम्भावना

काठमाडौँ । जल तथा मौसम पूर्वानुमान महाशाखाले शुक्रबार देशभर वर्षा हुने सम्भावना रहेको जनाएको छ। हाल मनसुनको न्यूनचापीय रेखा सरदर स्थानको आसपासमा रहेकाले बंगालको खाडीबाट आएको मनसुनी हावाको प्रभाव केही बढेको महाशाखाले जनाएको हो।

शुक्रबार बिहान देशभर आंशिकदेखि साधारणतया बदलीको अवस्था रहेको छ। दिउँसो कोशी, गण्डकी र सुदूरपश्चिम प्रदेशका एक/दुई ठाउँमा ठूलो पानी पर्ने सम्भावना छ भने देशका धेरै स्थानमा मध्यम वर्षा हुने पूर्वानुमान गरिएको छ। महाशाखाका अनुसार कोशी र लुम्बिनी प्रदेशका केही स्थानमा पहिले नै भारी वर्षा भएको छ।

सातै प्रदेशका अधिकांश पहाडी भूभागमा हल्कादेखि मध्यम वर्षाको सम्भावना रहेको मौसमविदले बताएका छन्। राति कोशी र सुदूरपश्चिम प्रदेशका केही ठाउँमा ठूलो पानी पर्ने अनुमान छ। पछिल्लो १२ घण्टामा बागमती, लुम्बिनी, कर्णाली र सुदूरपश्चिम प्रदेशका एक/दुई स्थानमा ठूलो वर्षा रेकर्ड भएको महाशाखाले जनाएको छ।

भोलि भने भारी वर्षाको सम्भावना कम रहे पनि मध्यम वर्षा हुने पूर्वानुमान छ। ठूलो पानी पर्ने स्थानमा बाढीको जोखिम रहने भएकाले नदी–खोला किनारमा बस्नेहरुलाई विशेष सतर्कता अपनाउन महाशाखाले आग्रह गरेको छ।