हेटौंडाबाट विप्लवका ७ नेता तथा कार्यकर्ता पक्राउ

मकवानपुर । मकवानपुर प्रहरीले हेटौंडा उपमहानगरपालिका–१० बसपार्कबाट नेत्रविक्रम चन्द विप्लव नेतृत्वको नेकपाका ७ जना नेता तथा कार्यकतालाई पक्राउ गरेका छ ।

सरकारले ल्याएको अध्यादेश रोक्ने षड्यन्त्र भएको भन्दै हेटौंडा बसपार्कमा पुर्व–पश्चिम राजमार्ग अवरोध गर्न खोजेपछि अखिल क्रान्तिकारी मकवानपुरका उपाध्यक्ष सुर्य सिंहसहित ७ जनालाई पक्राउ गरेको मकवानपुरका प्रहरी नायव उपरीक्षक टेकबहादुर कार्कीले जानकारी दिए ।

पक्राउ पर्नेहरुमा अखिल क्रान्तिकारी पश्चिम बागमती संयोजक बिबेक घलान, अखिल क्रान्तिकारी मकवानपुर उपाध्यक्ष सुर्य सिंह, केन्द्रिय पार्टी सदस्य राम घलान, अखिल क्रान्तिकारी जिल्ला सदस्यहरु सुरज घलान, अमन लामा, रबि रुम्बा र भुषण लामा रहेका छन् ।

पक्राउ परेका उनीहरुलाई आजै साँझ पौने ५ बजेको समयमा अब आईन्दा यस्तो कार्य नगर्ने भनि कागज गरी आफन्तको जिम्मा लगाई पठाईएको प्रहरी नायव उपरीक्षक कार्कीले बताए ।

नेकपाले सरकारसँग भएको तीन बुँदे सहमति कार्यान्वयका लागि ल्याइएको अध्यादेश रोक्ने षड्यन्त्र भएको भन्दै संघर्षको कार्यक्रम घोषणा गरेको थियो । आन्दोलनको कार्यतालिका अनुसार, आज (मंगलबार) १० बजेदेखि ११ बजेसम्म चक्काजाम गर्ने थियो ।

सरकारले ल्याएको अध्यादेश अहिले शितलनिवासमा पुगेर रोकिएको छ । त्यसको चौतर्फि विरोध भइरहेको छ । अध्यादेश जारी भएपछि विप्लवसहित सिके राउत, रेशम चौधरीलगायतका व्यक्तिहरूले नेतृत्व गरेका राजनीतिक समूहका नेता कार्यकर्तालाई रिहा गर्न बाटो खुल्ने बताईएको छ ।