कर्मचारी समायोजन सम्बन्धी मुद्दाको फैसला भदौ १ गते

काठमाडौं । सर्वोच्च अदालतले कर्मचारी समायोजन सम्बन्धी सबै मुद्दाको फैसला आगामी भदौं १ सुनाउने भएको छ । कर्मचारी समायोजन सम्बन्धी एक सय भन्दा बढी मुद्दाहरुको एकमुष्ट सुनुवाई गर्दै संवैधानिक इजलासले दुई सातापछि निर्णय सुनाउने मिति घोषणा गरेको हो ।

कर्मचारी समायोजन सम्बन्धी विवाद सुनुवाइका लागि कामू प्रधानन्यायाधीश दीपककुमार कार्की, न्यायाधीशहरु विश्वम्भरप्रसाद श्रेष्ठ, अनिलकुमार सिन्हा, बमकुमार श्रेष्ठ र टंकबहादुर मोक्तानको संवैधानिक इजलास गठन भएको थियो ।

संघीयता कार्यान्वयनसँगै सरकारले निजामती सेवामा रहेका कर्मचारीहरुलाई स्थानीय र प्रदेश सभामा समायोजन गरेको थियो । समायोजनका क्रममा कनिष्ठतम कर्मचारीहरुलाई स्थानीय र प्रदेश तहमा पठाउन प्राथमिकतामा राखिएको थियो । संघीय निजामती सेवामा नियुक्त भएपनि आफूहरुलाई अन्यायपूर्ण तरिकाले समायोजन गरिएको भन्दै कर्मचारीहरुले सर्वोच्च अदालतमा मुद्दा हालेका थिए । ती मुद्दा केही वर्षयता सर्वोच्च अदालतमा विचाराधीन थिए ।

२०७९ असार ७ मा संवैधानिक इजलासको फाँटमा दर्ता भएको मुद्दा असार २९ गतेदेखि नियमित सुनुवाइ हुन थालेको हो । संवैधानिक इजलासले यो विवाद निर्णय सुनाएपछि कर्मचारी समायोजन सम्बन्धी संवैधानिक तथा कानूनी विवादको अन्त्य हुने भएको छ ।