उपराष्ट्रपति यादव र फ्रान्सेली राजदूतबीच भेटवार्ता
तु खबर संवाददाता
उपराष्ट्रपति रामसहायप्रसाद यादवसँग नेपालका लागि फ्रान्सका राजदूत भर्जिनी कोर्टेभल बीच शिष्टाचार भेटवार्ता भएको छ। भेटवार्ता आज उपराष्ट्रपतिको कार्यालयमा भएको हो।
भेटवार्तामा नेपाल– फ्रान्स सम्बन्धका विविध आयामबारेमा छलफल भएको बताइएको छ। उपराष्ट्रपति यादवले नेपाल र फ्रान्सबीच कूटनीतिक सम्बन्ध स्थापना भएयता दुई देशबीचको पारस्परिक सम्मान, सहयोग र मैत्रीमा आधारित सम्बन्ध अझ उन्नत भएको बताएका थिए।
उनले फ्रान्सेली क्रान्तिका आधारभूत मूल्यहरू स्वतन्त्रता, समानता र भ्रातृत्वले नेपालको राजनीतिक आन्दोलनलाई पनि प्रेरित गर्दै आएको उल्लेख गरेका थिए।
फ्रान्सले युरोपेली सङ्घ (इयु) मार्फत नेपाललाई प्रदान गर्दै आएको सहयोगका लागि उपराष्ट्रपति यादवले धन्यवाद ज्ञापन गर्दै दुई देशबीचको सम्बन्ध आगामी दिनमा अझ प्रगाढ हुँदै जाने विश्वास व्यक्त गरे।
साथै उपराष्ट्रपति यादवले फ्रान्सको आसन्न राष्ट्रिय दिवसका अवसरमा राजदूत कोर्टेभलमार्फत फ्रान्सका राष्ट्रपति इम्यानुयल म्याक्रो र फ्रान्सेली जनताको सुख, शान्ति र समृद्धिको कामना समेत गरेका छन्।
राजदूत भर्जिनी कोर्टेभलले आफ्नो कार्यकालमा फ्रान्स र नेपालबीचको सम्बन्धलाई अझ सुदृढ बनाउने प्रयास भएको बताएकी थिइन्।