गाजा युद्ध अन्त्यतर्फ: हमास–इजरायल वार्ताको सुरुआत

काठमाडौं । महिनौँदेखि जारी गाजा युद्ध अन्त्य गर्ने प्रयासबीच अमेरिकी राष्ट्रपति डोनाल्ड ट्रम्पद्वारा प्रस्तुत शान्ति योजनाले नयाँ मोड लिएको छ। इजरायली प्रधानमन्त्रीको कार्यालयले शनिबार बिहान विज्ञप्ति जारी गर्दै हमासको प्रतिक्रियापछि योजनाको पहिलो चरण “तुरुन्तै कार्यान्वयन” गर्न तयारी गरिएको जनाएको हो।

यसअघि हमासले बन्धकहरूको रिहाइबारे “तुरुन्त वार्ता” गर्न तयार रहेको घोषणा गरेको थियो। यद्यपि, उसले प्रस्तावलाई पूर्ण रूपमा बिना शर्त स्वीकार नगरेको स्पष्ट पारेको छ। ट्रम्पको योजनाअनुसार बाँकी ४८ जना बन्धकलाई ७२ घण्टाभित्र मुक्त गर्नुपर्नेछ भने गाजाको सत्ता संक्रमण पनि प्रमुख अंशको रूपमा समावेश छ।

राष्ट्रपति ट्रम्पले आफ्नो सामाजिक सञ्जाल ट्रुथ सोशलमार्फत यसलाई “ठूलो दिन” भन्दै स्वागत गरेका छन्। उनले इजरायललाई बन्धक उद्धारका लागि तत्काल बमबारी रोक्न आग्रह गर्दै, “शान्ति बोर्ड” को निगरानीमा स्थायी युद्धविराम सम्भव हुने विश्वास व्यक्त गरे। तर इजरायली विज्ञप्तिले बमबारी रोक्नेबारे कुनै स्पष्ट संकेत दिएको छैन।

सीएनएन समाचारका अनुसार हमासले भने गाजाको शासन स्वतन्त्र प्राविधिक समितिलाई हस्तान्तरण गर्न तयार रहेको जनाएको छ, जसलाई प्यालेस्टिनी राष्ट्रिय सहमति र अरब–इस्लामिक समर्थन प्राप्त हुने बताइएको छ। तर उसले निशस्त्रीकरण वा अन्तर्राष्ट्रिय निरीक्षण समितिबारे ट्रम्पको प्रस्तावका अंशलाई स्वीकार नगरेको स्पष्ट भएको छ।

इजिप्ट र कतारले हमासको प्रतिक्रियालाई “सकारात्मक विकास” भन्दै स्वागत गरेका छन् भने इजरायली विपक्षी नेता याएर लापिडले यसलाई “अभूतपूर्व अवसर” भन्दै तत्काल वार्तामा सामेल हुन आग्रह गरेका छन्।

ट्रम्पले सोमबार इजरायली प्रधानमन्त्री बेन्जामिन नेतान्याहूसँगै ह्वाइट हाउसमा प्रस्तुत गरेको २० बुँदे योजनामा युद्धविराम, बन्धक रिहाइ, कैदी मुक्तिको साटासाट, गाजाको सत्ता हस्तान्तरण र अन्तर्राष्ट्रिय निगरानीजस्ता विषय समेटिएका छन्। तर अन्तिम युद्धविराम सम्झौता अझै अनिश्चित देखिएको छ।