ट्रम्प–नेतान्याहू बीच २० बुँदे योजनामा सहमति

राष्ट्रपति डोनाल्ड ट्रम्पले सोमबार इजरायली प्रधानमन्त्री बेन्जामिन नेतन्याहुसँगको संयुक्त घोषणामा गाजामा करिब दुई वर्ष लामो युद्ध अन्त्य नजिक पुगेको बताएका छन्। नेतन्याहूले युद्धविरामका लागि ट्रम्पले अघि सारेको २०-बुँदे योजनामा सहमति जनाएपछि अब बाँकी निर्णय हमासको हातमा रहेको बताइएको छ।

ट्रम्पले प्रस्तुत गरेको योजनाले इजरायलले सम्झौता सार्वजनिक रूपमा स्वीकार गरेको ७२ घण्टाभित्र हमासले सबै बाँकी बन्धकहरू रिहा गर्नुपर्ने प्रावधान राखेको छ। नेतन्याहू र ट्रम्प दुबैले हमासले प्रस्ताव अस्वीकार गरे कडा परिणाम हुने चेतावनी दिएका छन्।

ट्रम्पले यसलाई “ऐतिहासिक शान्ति” को अवसरको रूपमा चित्रण गर्दै सकारात्मक जवाफको अपेक्षा गरेका छन्। नेतन्याहूले भने, “हमासले अस्वीकार गरे वा उल्लङ्घन गरे, इजरायल आफैंले युद्ध अन्त्य गर्नेछ।”

यो सम्झौता सफल भए ट्रम्पको लागि ठूलो कूटनीतिक उपलब्धि हुने देखिन्छ। अमेरिकी अधिकारीहरूले यसलाई अब्राहम सम्झौतामा आधारित मध्यपूर्व शान्ति पहल विस्तार गर्ने ढोका खोल्ने सम्भावना भएको बताएका छन्।

तर योजनामा अझै चुनौती बाँकी छ — विशेषगरी हमासको भूमिका र गाजाको भविष्य शासनको प्रश्न। यसअघि भएको युद्धविरामहरू छोटो समयमै भंग भएका थिए। यसपटक सम्झौता कार्यान्वयन भए, युद्धले ध्वस्त पारेको गाजामा स्थायी शान्ति ल्याउने सम्भावना बलियो हुने बताइन्छ।