गाजामा इजरायली सैन्य योजना तीव्र, युद्धविराम अनिश्चित

हमासले कतार र इजिप्टका मध्यस्थकर्तामार्फत प्रस्तुत गरिएको पछिल्लो गाजा युद्धविराम प्रस्ताव स्वीकार गरेको झण्डै एक हप्ता बितिसक्दा पनि इजरायलले अझै आधिकारिक प्रतिक्रिया दिएको छैन। प्रधानमन्त्री बेन्जामिन नेतन्याहूले बन्धकहरू फिर्ता ल्याउन र युद्ध अन्त्य गर्न “तुरुन्त वार्ता सुरु गर्ने” दाबी गरेपनि, टेबलमा रहेको प्रस्तावबारे स्पष्ट टिप्पणी गरेका छैनन्।

नेतान्याहूले गत १८ महिनासम्म आंशिक, चरणबद्ध युद्धविराम सम्झौतामात्र मान्ने नीति अपनाएपछि अहिले भने उनले पूर्ण र व्यापक सम्झौताको माग अघि सारेका छन्। उनको नयाँ रणनीतिअनुसार सबै बन्धकहरूको तत्काल रिहाइ र युद्धको पूर्ण अन्त्य आवश्यक शर्त बनाइएको छ। यससँगै उनले गाजा शहर कब्जा गर्ने सैन्य योजनालाई पनि तीव्रता दिएका छन्।

सीएनएन समाचार अनुसार वरिष्ठ इजरायली स्रोतहरूका अनुसार नेतन्याहूको यो नीतिगत मोड वाशिंगटनसँग गहिरो सम्बन्धित छ। अमेरिकी राष्ट्रपति डोनाल्ड ट्रम्पले हालै गाजामा इजरायलको नयाँ आक्रमणलाई खुलेर समर्थन गर्दै अस्थायी युद्धविरामभन्दा “हमासलाई ध्वस्त पार्ने” रणनीति अघि सारेका छन्। ट्रम्पले कतारमा भएको अन्तिम चरणको वार्ता असफल भएपछि हमासमाथि अविश्वास प्रकट गर्दै, “तिनीहरू सम्झौतामा होइन, लडाइँमै मरिहाल्न चाहन्छन्” भन्दै टिप्पणी गरेका थिए।

यही सन्देशसँगै नेतन्याहूको कार्यालयले “सबै वा केही पनि होइन” दृष्टिकोण लिएको छ। उनले अस्थायी सम्झौतामार्फत आधा बन्धक फिर्ता गर्ने प्रस्तावलाई नजरअन्दाज गर्दै पूर्ण सम्झौता मात्र विकल्प भएको बताएका छन्।

हमासका वरिष्ठ नेता बसेम नइमले भने, “हामीले युद्धविराम सम्झौताको लागि आवश्यक सबै कुरा प्रस्तुत गरिसकेका छौँ र अझै पनि जिम्मेवारीसहित तयार छौँ। तर नेतन्याहूलाई ट्रम्प प्रशासनबाट हरियो बत्ती मिलेकै कारण उनी फोहोर खेल खेलिरहेका छन्।”

यसबीच, नेतन्याहूको मौनताले मध्यस्थकर्ताहरू र बाँकी बन्धक परिवारलाई अलमलमा पारेको छ। परिवारहरूले आफ्ना प्रियजनहरूको जीवनलाई राजनीतिमा बलिदान गरिएको आरोप लगाएका छन्।