ट्रम्पले पुटिनलाई दिए दुई हप्ताको अल्टिमेटम, युक्रेन युद्ध अन्त्यका लागि दबाब

अमेरिकी राष्ट्रपति डोनाल्ड ट्रम्पले रूसी राष्ट्रपति भ्लादिमिर पुटिनलाई “दुई हप्ता”को समयसीमा दिँदै युक्रेन युद्ध अन्त्यका लागि छलफल गर्न आग्रह गरेका छन्। शुक्रबार उनले भने, “म पुटिन र युक्रेनी राष्ट्रपति जेलेन्स्कीलाई भेट्न चाहन्छु, तर धेरैले भन्नुभएको छ त्यस्तो बैठकबाट केही आउँदैन। तर हामीले प्रयास गर्नै पर्छ, किनकि दीनप्रदीन मानिसहरू मरीरहेक छन।

ट्रम्पले पटक–पटक आफ्नो दुई हप्ते अल्टिमेटम दोहोर्याउँदै भने, “दुई हप्ताभित्र हामी कुन बाटो जाँदैछौं भन्ने थाहा हुनेछ। यदि पुटिन वार्ता टेबुलमा आउँदैनन् भने त्यो पनि स्पष्ट हुनेछ।”

सीएनएन समाचार अनुसार रुसका विदेशमन्त्री सर्गेई लाभरोभले दुई नेताबीच भेटवार्ताको कुनै योजना नभएको बताएका छन्। पुटिनले भने हालै ट्रम्पसँगको भेटलाई “धेरै राम्रो” भन्दै रुसले युद्ध अन्त्य गर्न चासो राखेको बताए पनि जेलेन्स्कीसँगको प्रत्यक्ष वार्ताबारे कुनै टिप्पणी गरेका छैनन्।

अलास्कामा भएको भेटपछि ट्रम्पले पुटिनले पठाएको आफ्नो संयुक्त फोटो सार्वजनिक गर्दै आगामी विश्वकप र अन्य कूटनीतिक अवसरमा सम्भावित पुनर्भेटको संकेत पनि दिएका छन्। उनले भने, “हामीसँग अर्को दुई हप्तामा धेरै कुरा प्रष्ट हुनेछन्।”

यससँगै, ट्रम्पले त्रिपक्षीय बैठक (पुटिन–जेलेन्स्की–ट्रम्प) सम्भावना खुला छ भन्दै पुटिन र जेलेन्स्कीलाई वार्ता टेबुलमा आउन दबाब दिइरहेका छन्।