सांसदहरुलाई उपत्यका नछाड्न एमालेको सूचना

काठमाडौँ । उपसभामुख इन्दिरा राना मगरलाई पदबाट हटाउने तयारीसँगै नेकपा एमालेले उपत्यका बाहिर रहेका आफ्ना सांसदहरूलाई बुधबार बेलुकासम्म काठमाडौँ फर्किन निर्देशन दिएको छ ।

एमालेका प्रमुख सचेतक महेश बर्तौलाको निर्देशनमा संसदीय दलबाट बाहिर रहेका सांसदहरूलाई तत्काल फर्कन भनिएको हो ।

मंगलबार एमालेले आफ्ना सांसदहरूलाई मोबाइलमा मेसेज पठाउँदै तत्काल उपत्यका बाहिरका कार्यक्रममा नजान र उपत्यकामा रहेका आफ्ना सांसदहरूलाई कहीँ नजान सूचना पठाएको छ ।

यसअघि सत्तारुढ दल नेपाली कांग्रेस र नेकपा एमालेले उपसभामुख रानालाई पदमुक्त गर्ने तयारी स्वरूप हस्ताक्षर संकलन सुरु गरिसकेका छन । मंगलबार मात्र कांग्रेस र एमालेले सांसदहरूलाई खाली कागजमा हस्ताक्षर गराएका थिए ।