रूसलाई शान्तिमा ल्याउने शक्ति ट्रम्पसँग मात्र छ : युक्रेनी राष्ट्रपति जेलेन्स्की
तु खबर संवाददाता
युक्रेनी राष्ट्रपति भोलोडिमिर जेलेन्स्कीले अमेरिकी राष्ट्रपति डोनाल्ड ट्रम्पसँगको उच्चस्तरीय भेट अघि सामाजिक सञ्जाल ‘एक्स’ मा सन्देश सार्वजनिक गर्दै रूसलाई शान्तिमा ल्याउने शक्ति संयुक्त राज्य अमेरिकासँग मात्र रहेको बताएका छन्।
जेलेन्स्कीले लेखेका छन्, “रसियालाई बलको माध्यमबाट मात्र शान्तिमा ल्याउन सकिन्छ, र राष्ट्रपति ट्रम्पसँग त्यो शक्ति छ। हामीले शान्तिको लागि सबै कुरा सही गर्नुपर्दछ।”
उनको प्रशंसा युरोपेली नेताहरूसँगको संयुक्त बैठकपछि युक्रेनका लागि अमेरिकी विशेष दूत किथ केलोगलाई धन्यवाद दिँदै आएको हो। उनले भने, जब युरोपमा एउटा देशको लागि शान्तिको चर्चा हुन्छ, त्यसको अर्थ सम्पूर्ण युरोपको लागि शान्ति हुन्छ। हामी युद्ध अन्त्य गर्न र भरपर्दो सुरक्षा सुनिश्चित गर्न अधिकतम प्रयासका साथ काम जारी राख्न तयार छौं।
जेलेन्स्कीले पछिल्लो रात रूसी सेनाले युक्रेनी सहरहरूमा आक्रमण जारी राख्दा दुई बालबालिकासहित नागरिक मारिएको र दर्जनौं घाइते भएको उल्लेख गर्दै रणभूमि र कूटनीतिक प्रयासबारे अमेरिकासँग निरन्तर छलफल भइरहेको जनाएका छन्।
सोमबार ह्वाइट हाउसमा हुने बैठकमा राष्ट्रपति ट्रम्प र जेलेन्स्कीबीच प्रत्यक्ष वार्ता हुने कार्यक्रम छ। यसअघि ट्रम्प, जेलेन्स्की र अमेरिकी उपराष्ट्रपति जेडी भान्सबीच सार्वजनिक मौखिक विवाद भएको स्मरण रहँदै आएको छ।
यसपटकको भेट ट्रम्पले केही दिनअघि मात्र रुसी राष्ट्रपति भ्लादिमिर पुटिनसँग युद्धविरामबारे छलफल गरेपछि हुन लागेको हो। उक्त बैठकमा जर्मन चान्सलर फ्रेडरिक मर्ज, फ्रान्सेली राष्ट्रपति इमानुएल म्याक्रोन, इटालियन प्रधानमन्त्री जर्जिया मेलोनीलगायत युरोपेली नेताहरू पनि उपस्थित हुनेछन्।
