हमासले जारी गरेको बन्धक भिडियोले नेतान्याहु गहिरो चिन्तामा

गाजामा युद्ध चर्किँदै गर्दा प्यालेस्टिनी लडाकू समूह हमासले इजरायली बन्धकहरूको नयाँ भिडियो सार्वजनिक गरेको छ, जसले इजरायली प्रधानमन्त्री बेन्जामिन नेतान्याहुलाई “गहिरो आघात”मा पारेको छ।

भिडियोमा देखिएका दुई बन्धक — २१ वर्षीय जर्मन-इजरायली रोम ब्रास्लाभस्की र २४ वर्षीय इभ्याटार डेभिड — कमजोर र कुपोषित अवस्थामा भूमिगत सुरुङमा देखिन्छन्। इभ्याटारले भावुक आवाजमा भनेका छन्, “अहिले म के गरिरहेको छु मेरो आफ्नै चिहान खनेको हो।”

नेतान्याहुको कार्यालयद्वारा जारी विज्ञप्तिमा भनिएको छ कि प्रधानमन्त्रीले दुबै बन्धकका परिवारहरूसँग व्यक्तिगत रूपमा कुरा गरेका छन् र उनीहरूलाई “हाम्रा सबै बन्धकहरूलाई फिर्ता ल्याउने प्रयास जारी छ” भन्ने आश्वासन दिएका छन्।

पछिल्ला केही दिनमा हमास र इस्लामिक जिहादले अक्टोबर ७ को आक्रमणमा कब्जा गरिएका बन्धकहरूको तीनवटा भिडियो सार्वजनिक गरेका छन्। यी भिडियोहरूले बन्धकहरूको स्थितिप्रति अन्तर्राष्ट्रिय चिन्ता बढाइदिएको छ र युद्धविराम तथा बन्धक मुक्तिको लागि चर्किंदो माग पुनः सतहमा ल्याएको छ।

इजरायलभरिकै शहरहरूमा, विशेष गरी तेल अवीवमा, दसौं हजार प्रदर्शनकारीहरूले नेतान्याहू सरकारलाई बाँकी बन्धकहरूको सुरक्षित रिहाइ सुनिश्चित गर्न दबाब दिएका छन्।