त्रिभुवन विमानस्थलमा जहाज अवतरणमा समस्या, आधा दर्जनभन्दा बढी जहाज आकाशमै होल्ड

काठमाडौँ उपत्यकामा जारी निरन्तर भारी वर्षाका कारण त्रिभुवन अन्तर्राष्ट्रिय विमानस्थलमा आन्तरिक तथा अन्तर्राष्ट्रिय उडान अवतरणमा गम्भीर समस्या उत्पन्न भएको छ।

विमानस्थल स्रोतका अनुसार खराब मौसम र कमजोर भिजिबिलिटी (दृश्यता) का कारण जहाजहरू निर्धारित समयमा अवतरण गर्न नसकी आकाशमै फन्का मार्दै होल्ड गरिएका छन्।

हाल त्रिभुवन विमानस्थलको आकाशमा आधा दर्जनभन्दा बढी जहाजहरू होल्डिङ अवस्थामा रहेका छन्। लगातारको वर्षाका कारण काठमाडौँको आकाश धमिलो बनेको छ, जसले गर्दा पाइलटहरूले रनवे देख्न सक्ने अवस्था छैन।

विमानस्थल व्यवस्थापन कार्यालयले यात्रुहरूलाई धैर्य गर्न र मौसम सामान्य भएपछि मात्र उडानहरू नियमित गरिने जानकारी दिएको छ। साथै, वैकल्पिक विमानस्थलतर्फ डाइभर्ट गर्ने तयारी पनि सुरु गरिएको जनाइएको छ।

यता, मौसम पूर्वानुमान महाशाखाले काठमाडौँ उपत्यकालगायत गण्डकी, बागमती र लुम्बिनी प्रदेशका केही स्थानमा अझै केही घण्टा भारी वर्षा जारी रहने सम्भावना रहेको बताएको छ।

यात्रुहरूलाई आवश्यक सतर्कता अपनाउन र यात्रा योजनामा लचकता ल्याउन सुझाव दिइएको छ।